અરવિંદ કેજરીવાલ માટે સરકારી મકાનની માંગ, પણ નિયમો શું કહે છે? અહીં જાણો

દિલ્હીના પૂર્વ મુખ્યમંત્રી અરવિંદ કેજરીવાલે ટૂંક સમયમાં સીએમ આવાસ ખાલી કરવું પડશે. AAP નેતા રાઘવ ચઢ્ઢાએ દાવો કર્યો છે કે કેજરીવાલ પાસે પોતાનું કોઈ ઘર નથી. આવી સ્થિતિમાં આમ આદમી પાર્ટી કેજરીવાલ માટે સરકારી ઘરની માંગ કરી રહી છે. પાર્ટીનું કહેવું છે કે કેજરીવાલ એક રાષ્ટ્રીય પાર્ટીના અધ્યક્ષ અને પૂર્વ મુખ્યમંત્રી છે. પરંતુ શું અરવિંદ કેજરીવાલ સીએમ પદેથી રાજીનામું આપ્યા બાદ સરકારી આવાસના હકદાર છે? મકાનની ફાળવણીનો નિયમ શું કહે છે? આવો જાણીએ આ બધા સવાલોના જવાબ.

કેજરીવાલ ક્યારે ઘર ખાલી કરશે?

પૂર્વ મુખ્યમંત્રી અરવિંદ કેજરીવાલે રવિવારે કહ્યું કે તેઓ 3 ઓક્ટોબરથી શરૂ થઈ રહેલા નવરાત્રિ તહેવાર દરમિયાન તેમનું સત્તાવાર નિવાસસ્થાન ખાલી કરશે. કેજરીવાલે કહ્યું કે હું નવરાત્રિ દરમિયાન નિવાસસ્થાનમાંથી બહાર નીકળીશ અને જે લોકો મને રહેવાની ઓફર કરી રહ્યા છે તેમની વચ્ચે રહીશ. તેણે કહ્યું છે કે આજે મારી પાસે રહેવા માટે ઘર પણ નથી. ઘણા લોકો મને તેમના ઘરે રહેવા માટે આમંત્રણ આપી રહ્યા છે.