તાલિબાન અધિકારીનું મોટું નિવેદન, યુનિવર્સીટી છોકરીઓને ફરીથી પ્રવેશ આપવા તૈયાર છે પરંતુ…

અફઘાનિસ્તાનની યુનિવર્સિટીઓ તાલિબાનના સર્વોચ્ચ નેતા હિબતુલ્લા અખુન્દઝાદાની મંજૂરી મળ્યા બાદ છોકરીઓને ફરીથી પ્રવેશ આપવા તૈયાર છે. એક અધિકારીએ શનિવારે આ માહિતી આપી હતી. અફઘાનિસ્તાનના ઉચ્ચ શિક્ષણ મંત્રાલયના સલાહકાર મૌલવી અબ્દુલ જબ્બરે જણાવ્યું હતું કે જો અખુંદઝાદા પ્રતિબંધ હટાવવાનો આદેશ આપે તો યુનિવર્સિટીઓ છોકરીઓને ફરીથી પ્રવેશ આપવા તૈયાર છે.

જબ્બરે જણાવ્યું હતું કે તેઓ કહી શકતા નથી કે આવું ક્યારે થશે અને યુનિવર્સિટીમાં મહિલાઓના પ્રવેશ પરનો પ્રતિબંધ હટાવવામાં આવશે કે કેમ.

જબ્બરે એસોસિએટેડ પ્રેસને કહ્યું, “અખુંદઝાદાએ યુનિવર્સિટીઓને બંધ રાખવાનો આદેશ આપ્યો હતો, તેથી તે બંધ છે, તેઓ ત્યારે જ ખુલશે જ્યારે તે તેમને ફરીથી ખોલવાનું કહેશે. અમારા તમામ નેતાઓ (કન્યા શિક્ષણ ફરી શરૂ કરવાની) તરફેણમાં છે, અમારા મંત્રીઓ પણ તેની તરફેણમાં છે.

જબ્બરે કહ્યું કે તે સાત-આઠ વર્ષ પહેલા અખુંદઝાદાને છેલ્લે મળ્યો હતો. તે અફઘાનિસ્તાનમાં 10 વર્ષના સોવિયત યુદ્ધ દરમિયાન રશિયનો સામે તેમની સાથે લડ્યો હતો અને 27 વર્ષ સુધી તાલિબાનનો ભાગ હતો. તેણે કહ્યું, ‘આપણી આજ્ઞાપાલન (અખુન્દઝાદાને)ના કારણે જ અમે તેમના આદેશનું પાલન કરી રહ્યા છીએ.’

જબ્બારની ટિપ્પણીઓ તાલિબાનની અંદર નિર્ણય લેવાની પ્રક્રિયા અને અખુંદઝાદાના આદેશો અંગેના મતભેદનો બીજો સંકેત છે. જો કે, મુખ્ય પ્રવક્તા ઝબીહુલ્લા મુજાહિદે તરત જ વિભાજનના અહેવાલોને ફગાવી દીધા હતા. તેઓ એવો પણ દાવો કરે છે કે તાલિબાન પર અખુંદઝાદાનો અધિકાર છે.

તમને જણાવી દઈએ કે, ગયા વર્ષે ડિસેમ્બરમાં તાલિબાને મહિલાઓના યુનિવર્સિટી જવા પર પ્રતિબંધ લગાવી દીધો હતો, જેની દુનિયાભરમાં ટીકા થઈ હતી.

ઓગસ્ટ 2021માં તાલિબાન સત્તામાં આવતાની સાથે જ છોકરીઓને છઠ્ઠા ધોરણથી આગળ ભણવા પર પ્રતિબંધ મૂકવામાં આવ્યો હતો. અફઘાનિસ્તાન વિશ્વનો એકમાત્ર એવો દેશ છે જ્યાં મહિલાઓના શિક્ષણ પર પ્રતિબંધ છે.