ગુજરાત બાદ દિલ્હીમાં સર્જાઈ મોટી હોનારત, હોસ્પિટલમાં ભીષણ આગ લાગતા ૬ બાળકોના મોત

દિલ્હી: પૂર્વ દિલ્હીના વિવેક વિહારમાં શનિવારે રાત્રે એક નિયોનેટલ કેર હોસ્પિટલમાં ભીષણ આગ લાગી હતી. કુલ 12 બાળકોને બચાવી લેવામાં આવ્યા હતા, જેમાંથી 6 મૃત્યુ પામ્યા હતા, 1 વેન્ટિલેટર પર છે અને 5 અન્ય હોસ્પિટલમાં દાખલ છે, માહિતી મળતાં જ પોલીસ અધિકારીઓ અને ફાયરમેન ઘટનાસ્થળે પહોંચી ગયા હતા અને આગને કાબૂમાં લીધી હતી. અગ્નિશમન અધિકારીના જણાવ્યા અનુસાર, આગ સંપૂર્ણપણે બુઝાઈ ગઈ હતી, 11 નવજાત બાળકોને બચાવીને અન્ય હોસ્પિટલમાં લઈ જવામાં આવ્યા હતા.

ફાયર ઓફિસર રાજેશે જણાવ્યું કે, રાત્રે 11:32 વાગ્યે ફાયર સર્વિસ કંટ્રોલ રૂમને માહિતી મળી કે હોસ્પિટલમાં આગ લાગી છે. કુલ 16 ફાયર ટેન્ડર ઘટના સ્થળે પહોંચી ગયા હતા અને આગને સંપૂર્ણપણે કાબુમાં લેવામાં આવી હતી. આગથી બે ઈમારતોને અસર થઈ હતી. ત્યાં એક હોસ્પિટલ બિલ્ડીંગ છે અને જમણી બાજુએ રહેણાંક મકાનના 2 માળે પણ આગ લાગી હતી. 11-12 લોકોને બચાવીને હોસ્પિટલમાં લઈ જવામાં આવ્યા હતા.

દિલ્હી પોલીસે હોસ્પિટલના માલિક નવીન ચિનચીન વિરુદ્ધ એફઆઈઆર નોંધી છે, જે આઈપીસીની કલમ 336, 304A અને 34 હેઠળ નોંધવામાં આવી છે. હોસ્પિટલ પાસે આગ માટે એનઓસી હતી કે નહીં તેની તપાસ કરવામાં આવી રહી છે. હોસ્પિટલ માલિક હજુ ફરાર છે.

આઝાદ નગરમાં રહેણાંક મકાનમાં આગ

દિલ્હીના શાહદરાના પશ્ચિમ આઝાદ નગરમાં રહેણાંક મકાનમાં આગ લાગી હતી. ફાયર ઓફિસર રાજેન્દ્ર અટવાલનું કહેવું છે કે, દિલ્હી ફાયર સર્વિસ કંટ્રોલ રૂમને સવારે 2.35 વાગ્યે ફોન આવ્યો કે અહીં એક મકાનમાં આગ લાગી છે. અહીં માત્ર એક જ ઈમારત છે. બિલ્ડીંગમાં ફસાયેલા લોકો ગરમી અને ધુમાડાના કારણે બહાર આવી શકતા નથી. અમે અત્યાર સુધીમાં 13 લોકોને બચાવ્યા છે અને તેમને હોસ્પિટલમાં દાખલ કર્યા છે.