25 લાખની સોપારી, અદ્યતન હથિયાર…, આ રીતે બિશ્નોઈ ગેંગે સલમાન ખાનની હત્યાનું ઘડ્યું કાવતરું

સલમાન ખાનની હત્યાના કાવતરાને લઈને એક નવો અને મોટો ખુલાસો સામે આવ્યો છે. સલમાનની હત્યાના પ્લાનિંગને લઈને મહારાષ્ટ્રની પનવેલ પોલીસે દાખલ કરેલી ચાર્જશીટમાં ઘણી બાબતો સામે આવી છે. બોલિવૂડ એક્ટરને મારવા માટે 25 લાખ રૂપિયાનો કોન્ટ્રાક્ટ આપવામાં આવ્યો હતો. ગેંગસ્ટર લોરેન્સ બિશ્નોઈની ગેંગના લોકો તેને મારવા માટે અદ્યતન હથિયારો મેળવવાની યોજના બનાવી રહ્યા હતા.

વાસ્તવમાં 14 એપ્રિલે મુંબઈના પોશ વિસ્તાર બાંદ્રામાં સલમાન ખાનના ઘરની બહાર મોટરસાઈકલ પર સવાર બે લોકોએ અનેક રાઉન્ડ ફાયરિંગ કર્યું હતું. આ ટોળકીએ સલમાન ખાન પર તેના પનવેલ સ્થિત ફાર્મહાઉસ પાસે હુમલો કરવાની યોજના બનાવી હતી. આ ગેંગનો પ્લાન વિદેશમાંથી હથિયાર આયાત કરવાનો હતો. તપાસમાં બહાર આવ્યું છે કે ગેંગ અભિનેતાને તુર્કી બનાવટની ઝિગાના પિસ્તોલથી મારવાનો ઇરાદો ધરાવતી હતી, જેનો ઉપયોગ 2022માં પંજાબી ગાયક સિદ્ધુ મૂઝવાલાને શૂટ કરવા માટે કરવામાં આવ્યો હતો.

પાકિસ્તાનના ડીલરનો સંપર્ક

એક આરોપીએ પૂછપરછ દરમિયાન ખુલાસો કર્યો હતો કે તે અભિનેતા પર કથિત હુમલો કરવા માટે M16, AK-47 અને AK-92 રાઇફલ્સ ખરીદવા માટે પાકિસ્તાનમાં હથિયારોના વેપારી સાથે સંપર્કમાં હતો. સલમાન ખાનના ઘરની બહાર ફાયરિંગ કરવાના મામલામાં પોલીસે લોરેન્સ બિશ્નોઈ અને તેના નાના ભાઈ અનમોલ બિશ્નોઈ સહિત 17 લોકો વિરુદ્ધ કેસ નોંધ્યો છે. લોરેન્સ બિશ્નોઈ હાલ અમદાવાદની સાબરમતી જેલમાં બંધ છે.

ઝોન II (પનવેલ)ના ડેપ્યુટી કમિશનર ઓફ પોલીસ વિવેક પાનસરેએ જણાવ્યું હતું કે પનવેલ પોલીસ સ્ટેશનના વરિષ્ઠ નિરીક્ષકને સપ્ટેમ્બર-ઓક્ટોબર 2023માં સલમાન પર હુમલો કરવાના કાવતરા અંગે ઈનપુટ મળ્યા હતા. પોલીસને જાણવા મળ્યું કે લોરેન્સ બિશ્નોઈ ગેંગના સભ્યોએ સલમાનના પનવેલ ફાર્મહાઉસ, બાંદ્રા, મુંબઈમાં તેના ઘરની આસપાસના વિસ્તારો અને તે જ્યાં ફિલ્મના શૂટિંગ માટે ગયો હતો તે સ્થળોની તપાસ કરી હતી.