By કડી શહેરના મધ્યમાં આવેલા ટાવર પાસે સ્થિત ખજાના ટ્રેડર્સમાં સેન્ટ્રલ જી.એસ.ટી વિભાગે મોટી તપાસ હાથ ધરી છે. બુધવારે સાંજે અચાનક જ જીએસટી અધિકારીઓની ટીમ પેઢી પર પહોંચી ગઈ હતી. છેલ્લા 20 વર્ષથી કાર્યરત આ પેઢી શ્રીદેવી છાપ તમાકુ અને છીંકણીનો વ્યાપાર કરે છે. અધિકારીઓએ આખી રાત પેઢીના હિસાબોની ઝીણવટભરી તપાસ કરી હતી. તપાસ ગુરુવાર બપોર સુધી ચાલુ રહી હતી. બપોર બાદ તપાસ પૂર્ણ થતાં વેપારીએ પેઢીને તાળું મારી દીધું હતું. ગુરુવારે સવારે આ સમાચાર જાણતાં જ કડી શહેરના વેપારીઓમાં ફફડાટ ફેલાઈ ગયો હતો. જીએસટી અધિકારીઓએ કર ચોરીની આશંકાને પગલે આ તપાસ હાથ ધરી હોવાનું જાણવા મળ્યું છે. ગુરુવારે સવારે પણ અધિકારીઓએ દુકાનનું અડધું શટર પાડીને તપાસ ચાલુ રાખી હતી.
