By હિંમતનગર રેલવે સ્ટેશન પર પોલીસે આગ્રા કેન્ટથી અસારવા જતી ટ્રેનમાંથી વિદેશી દારૂની હેરાફેરી કરતા ત્રણ વ્યક્તિઓને ઝડપી લીધા છે. આરોપીઓમાં એક મહિલા, તેનો એન્જિનિયર ભત્રીજો અને એક કમ્પાઉન્ડર સામેલ છે. પોલીસે ફર્સ્ટ ક્લાસ કોચમાંથી રૂ. 1.64 લાખની કિંમતની વિદેશી દારૂની 60 બોટલ જપ્ત કરી છે. આરોપીઓ પાસેથી ચાર મોબાઈલ, રોકડ રકમ, દાગીના સહિત કુલ રૂ. 2.74 લાખનો મુદ્દામાલ કબજે લેવામાં આવ્યો છે. પકડાયેલા આરોપીઓમાં આગ્રા નિવાસી ભારતીબેન ધનવાની (ઉ.વ.54), જૂનાગઢના આઈટી એન્જિનિયર જશકુમાર રાતીયા (ઉ.વ.24) અને જૂનાગઢના કમ્પાઉન્ડર મિલનકુમાર મકવાણા (ઉ.વ.26)નો સમાવેશ થાય છે. કોર્ટમાં રજૂ કરવામાં આવેલા આરોપીઓમાંથી એન્જિનિયર જશકુમારના એક દિવસના રિમાન્ડ મંજૂર કરવામાં આવ્યા છે. જ્યારે ભારતીબેન અને મિલનકુમારને કોર્ટે જામીન પર મુક્ત કર્યા છે. આરોપીઓ આ દારૂનો જથ્થો આગ્રાથી રાજકોટ લઈ જઈ રહ્યા હતા.
