શ્રદ્ધાળુઓને લઈ જઈ રહેલા ટ્રેક્ટરને ટ્રકે મારી ટક્કર, 3ના મોત, 11 ઘાયલ

કચ્છમાં એક મોટો માર્ગ અકસ્માત થયો છે. યાત્રાળુઓને લઈ જઈ રહેલા ટ્રેક્ટરને ટ્રકે ટક્કર મારી હતી. આ અકસ્માતમાં બે મહિલાઓ અને એક બાળકના મોત થયા છે, જ્યારે 11 અન્ય લોકો ઘાયલ થયા છે.

બનાવ અંગે માહિતી આપતા પોલીસે જણાવ્યું હતું કે, લખપત તાલુકાના માતા નં મઢ ખાતે આવેલા આશાપુરા માતાના મંદિરેથી ભક્તો સાથે પરત ફરી રહેલા ટ્રેક્ટરને પાછળથી પૂરપાટ ઝડપે આવી રહેલા ટ્રેલર ટ્રકે ટક્કર મારી હતી.

સામખિયાળી પોલીસ સ્ટેશનના એક અધિકારીએ જણાવ્યું હતું કે અકસ્માતમાં બે મહિલાઓ અને એક 9 વર્ષના બાળકનું ઘટનાસ્થળે જ મોત નીપજ્યું હતું, જ્યારે અન્ય 11 લોકો ઘાયલ થયા હતા, જેમાંથી ત્રણની હાલત ગંભીર છે. તેમણે જણાવ્યું હતું કે તમામ પીડિતો ટ્રેક્ટરમાં પરત ફરી રહ્યા હતા અને મોરબી જિલ્લાના ખાખરેચી ગામના રહેવાસી હતા. અધિકારીએ જણાવ્યું કે અકસ્માતની તપાસ કરવામાં આવી રહી છે.