દેશીનાં તાલે આખી દુનિયા ડોલે રે… નવસારીમાં આફ્રિકન યુવતીએ દોઢિયું લીધું
મા આદ્યશક્તિની આરાધનાના પર્વ નવલી નવરાત્રીનું આગમન થઈ ગયું છે. નવરાત્રીને લઈને ખેલૈયાઓમાં અનેરો ઉત્સાહ જોવા મળી રહ્યો છે. હાલ વિદેશમાં પણ ગરબાનો ક્રેઝ છે. વિદેશમાં વસતા ગુજરાતીઓ વિદેશમાં પણ ગરબાની રમઝટ બોલાવતા હોય છે. બૃહદ અનાવિલ સમાજ દ્વારા આયોજિત શિવાંજલીને નવરાત્રીને શહેરની સૌથી સંસ્કારી નવરાત્રી ગણવામાં આવે છે, અહીં પરંપરાગત વસ્ત્રો વગર એન્ટ્રી પણ મળતી નથી. અહીંની નવરાત્રીમાં એક આફ્રિકન યુવતી પરંપરાગત વસ્ત્રોમાં ગરબે ઘૂમતા જોવા મળી હતી. આ યુવતી આકર્ષણનું કેન્દ્ર બની છે.
આ યુવતીનું નામ કલવાની ગોડ ગ્રેસિયસ બ્રેવલી છે, આ યુવતી પોતે કેનિયાની છે. આ યુવતી ગરબા શીખવા અને રમવા ખાસ નવસારી આવી હતી. આ યુવતીએ જણાવ્યું હતું કે, તેણીએ નવસારીમાં રાસલીલા ગરબા ક્લાસિસમાં 4 મહિના સુધી ગરબાની તાલીમ લીધી હતી. રાસલીલા ગરબા ક્લાસીસ ખાતે તેઓએ ગરબાના તેમજ દોઢિયાના સ્ટેપ શીખ્યા હતા.
આ યુવતીએ પોતાનો ગરબાનો અનુભવ શાનદાર ગણાવ્યો હતો. ગરબા શીખવાડવા બદલ તેણીએ રાસલીલ ગરબા ક્લાસિસના નિકુંજ બાગલેનો આભાર માન્યો હતો. આ યુવતીએ ભારતીય સંસ્કૃતિ અને નવસારીના લોકોની મહેમાન ગતિના વખાણ કર્યા હતા. યુવતીએ જણાવ્યું છે કે, ભારતીય સંસ્કૃતિ ભવ્ય છે.