સ્પેનના PM સાથે વડાપ્રધાન મોદીનો મેગા રોડ શો, વડોદરાથી દેશને અનેક મોટી ભેટો, જાણો સંપૂર્ણ વિગતો

સ્પેનના વડાપ્રધાન પેડ્રો સાંચેઝ ભારતની મુલાકાતે છે. તેઓ સોમવારે વહેલી સવારે ગુજરાતના વડોદરા શહેરમાં પહોંચ્યા હતા. તેઓ ભારતની પ્રથમ સત્તાવાર મુલાકાતે છે. સ્પેન પરત ફરતા પહેલા તેઓ મંગળવારે મુંબઈની મુલાકાતે પણ જવાના છે. સ્પેનના પીએમ સાંચેઝે વડા પ્રધાન મોદી સાથે સોમવારે સવારે વડોદરામાં ટાટા એડવાન્સ્ડ સિસ્ટમ્સ લિમિટેડ (TASL) ખાતે C-295 એરક્રાફ્ટના ઉત્પાદન માટે ટાટા એરક્રાફ્ટ કોમ્પ્લેક્સનું સંયુક્તપણે ઉદ્ઘાટન કર્યું હતું. ઉદ્ઘાટન પહેલા તેમણે વડાપ્રધાન નરેન્દ્ર મોદી સાથે રોડ શોમાં ભાગ લીધો હતો.

લગભગ સાડા ત્રણ કિલોમીટરનો મેગા રોડ શો

પીએમ મોદીએ વડોદરામાં સ્પેનના વડાપ્રધાન સાથે રોડ શો કર્યો હતો. તેમનો રોડ શો વડોદરા એરપોર્ટથી ટાટા પ્લાન્ટ સુધી લગભગ સાડા ત્રણ કિલોમીટરનો હતો. તેમના રોડ શોને લઈને વડોદરાના લોકોમાં અનેરો ઉત્સાહ જોવા મળ્યો હતો. મોટી સંખ્યામાં લોકો એકઠા થયા હતા. સવારથી જ તેમના રોડ શોના રૂટની બંને બાજુ લોકો તેમને જોવા માટે ઉમટી પડ્યા હતા. લોકો પોસ્ટર અને બેનરો સાથે ઉભા હતા.

તમને જણાવી દઈએ કે વર્ષ 2022માં વડાપ્રધાન નરેન્દ્ર મોદીએ C 295 એરક્રાફ્ટ મેન્યુફેક્ચરિંગ ફેસિલિટી કોમ્પ્લેક્સના નિર્માણ માટે શિલાન્યાસ કર્યો હતો. વડોદરામાં ટાટાના આ એરક્રાફ્ટ કોમ્પ્લેક્સમાં કુલ 40 સી-295 એરક્રાફ્ટનું ઉત્પાદન કરવામાં આવશે. દેશમાં ખાનગી ક્ષેત્રની આ પ્રથમ એરક્રાફ્ટ મેન્યુફેક્ચરિંગ ફેસિલિટી છે. C-295 એરક્રાફ્ટના નિર્માણ હેઠળ કુલ 56 એરક્રાફ્ટ બનાવવાની યોજના છે.