ગાંધીનગરના ભાટ ગામ નજીક એક ઘરમાં ભીષણ આગ, એકનું મોત

ગાંધીનગરના ભાટ ગામ પાસે એક મકાનમાં અચાનક ભીષણ આગ લાગી હોવાની ઘટના સામે આવી છે. આ બનાવમાં પરિવારમાં પિતાનું મોત નીપજ્યું છે. જ્યારે માતા, પુત્ર અને પુત્રીનો આબાદ બચાવ થયો છે. ફાયર બ્રિગેડની ટીમે પાણીનો મારો ચલાવી આગ પર કાબૂ મેળવ્યો હતો. જો કે, આગ કયાં કારણોસર લાગી તે અંગે હાલ કોઈ ચોક્કસ માહિતી નથી.

ગાંધીનગરના ભાટ ગામ પાસે આવેલા એક મકાનમાં એક પરિવાર રહે છે. મકાનના બીજા માળે પિતા હતા અને માતા, પુત્ર અને પુત્રી નીચે હતા ત્યારે ઘરના રસોડામાં અચાનક આગ લાગી હતી. જોતા જોતા આગે વિકરાળ સ્વરૂપ ધારણ કર્યું હતું. જો કે, આગ લાગી હોવાની જાણ થતા માતા, પુત્ર અને પુત્રી ઘરમાંથી બહાર નીકળી ગયા હતા. પરંતુ, બીજા માળે રૂમ અંદરથી લોક હોવાથી અને ચાવી નીચે જોવાથી પિતા બહાર નીકળી શક્યા નહોતા અને આગની ચપેટમાં આવી ભડથું થયા હતા.

આગની ઘટનાની જાણ થતાં ફાયર બ્રિગેડની ટીમ ત્વરિત ઘટના સ્થળે પહોંચી હતી અને પાણીનો મારો ચલાવી આગ પર કાબૂ મેળવ્યો હતો. જો કે, રસોડામાં આગ લાગવાનું સાચું કારણ હાલ સામે આવ્યું નથી અને તે અંગે તપાસ ચાલી રહી છે. પ્રાથમિક તપાસ મુજબ, રસોડામાં ગેસનું કામકાજ ચાલતું હોવાથી ગેસની સગડી ઠંડી કરવા પાણી નાખવામાં આવતાં આગ ભભૂકી ઊઠી હતી. પિતાના મોતથી પરિવારમાં ગમગીની છવાઈ છે.