રાજ્યમાં બુલેટ ટ્રેન પ્રોજેક્ટ પર મોટી દુર્ઘટના, બાંધકામ સ્થળ પર માળખું ધરાશાયી થવાથી ત્રણ મજૂરોના મોત

આણંદ જિલ્લામાં મંગળવારે સાંજે મુંબઈ-અમદાવાદ બુલેટ ટ્રેન પ્રોજેક્ટ હેઠળ બાંધકામ સ્થળ પર બાંધવામાં આવેલ કામચલાઉ માળખું તૂટી પડતાં ત્રણ મજૂરોનાં મોત નીપજ્યાં હતાં. અધિકારીઓએ આ માહિતી આપી હતી. પોલીસ અધિક્ષક (SP) ગૌરવ જસાણીએ જણાવ્યું કે આ ઘટના વાસદ ગામમાં બની હતી. તેમણે કહ્યું કે પ્રાથમિક માહિતી મુજબ ચાર કામદારો કોંક્રીટના બ્લોક વચ્ચે ફસાયા છે.

આ અકસ્માત મંગળવારે સાંજે થયો હતો

નેશનલ હાઈ સ્પીડ રેલ કોર્પોરેશન લિમિટેડે જણાવ્યું હતું કે, ‘મંગળવારે સાંજે માહી નદી પર બુલેટ ટ્રેન પ્રોજેક્ટના નિર્માણ સ્થળ પર ત્રણ કામદારો કોંક્રિટ બ્લોક વચ્ચે ફસાઈ ગયા હતા. ક્રેન્સ અને ખોદકામ મશીનોની મદદથી બચાવ કામગીરી હાથ ધરવામાં આવી રહી છે. એક મજૂરને બચાવી લેવામાં આવ્યો છે. તેમને હોસ્પિટલમાં દાખલ કરવામાં આવ્યા છે.

આ બાબતે પ્રાથમિક માહિતી આપતા ડીએસપી આનંદ ગૌરવ જસાણીએ કહ્યું હતું કે, ‘બુલેટ ટ્રેન પ્રોજેક્ટ સાઈટ પર લગાવવામાં આવેલો ગર્ડર મંગળવારે સાંજે પડી ગયો હતો. આ ઘટનામાં 2 લોકોને બચાવીને હોસ્પિટલમાં ખસેડવામાં આવ્યા હતા. પ્રાથમિક માહિતી મુજબ 1 કે 2 વધુ લોકો ફસાયેલા હોઈ શકે છે, તેમને બચાવવા માટે ઓપરેશન હાથ ધરવામાં આવી રહ્યું છે. જોકે બાદમાં એક કામદારનું મોત થયું હતું.

બુલેટ ટ્રેન પ્રોજેક્ટ અંગે અધિકારીઓએ રવિવારે જણાવ્યું હતું કે 508 કિલોમીટર લાંબા મુંબઈ-અમદાવાદ બુલેટ ટ્રેન કોરિડોર માટે ગુજરાતમાં કુલ 20 નદી પુલમાંથી 12નું બાંધકામ પૂર્ણ થઈ ગયું છે. નેશનલ હાઇ સ્પીડ રેલ કોર્પોરેશન લિમિટેડ (NHSRCL) એ જણાવ્યું કે નવસારી જિલ્લામાં ખરેરા નદી પર 120 મીટર લાંબો પુલ તાજેતરમાં ગુજરાતમાં પૂર્ણ થયો છે. આ પ્રકારનો આ 12મો પુલ છે.