રણદીપ હુડ્ડાને રામ મંદિર પ્રાણ પ્રતિષ્ઠાનું આમંત્રણ, આ સ્ટાર્સને પણ આપવામાં આવ્યું આમંત્રણ

રણદીપ હુડ્ડા અવારનવાર ચર્ચામાં રહે છે. હવે અભિનેતાને 22 જાન્યુઆરીએ અયોધ્યામાં શ્રી રામ મંદિરના પ્રાણ પ્રતિષ્ઠા સમારોહમાં હાજરી આપવા માટે આમંત્રણ આપવામાં આવ્યું છે. 22મી જાન્યુઆરીના રોજ શ્રી રામ મંદિરના અભિષેક સમારોહનું આયોજન થવા જઈ રહ્યું છે, જેમાં દેશની મોટી હસ્તીઓની સાથે ઋષિ-મુનિઓ પણ પધારશે.

ANIના અધિકૃત X હેન્ડલે તાજેતરમાં એક પોસ્ટ શેર કરી છે. આ પોસ્ટમાં, રણદીપને રામ જન્મભૂમિ મંદિરના પ્રાણ પ્રતિષ્ઠા સમારોહમાં ભાગ લેવાનું સત્તાવાર આમંત્રણ પ્રાપ્ત થતું જોવા મળે છે. તસવીરમાં, રણદીપ બ્રાઉન ટી-શર્ટ અને બ્લુ જીન્સ પહેરેલો અને હાથમાં આમંત્રણ પત્રક પકડીને હસતો જોઈ શકાય છે. તમને જણાવી દઈએ કે આ પહેલા આલિયા ભટ્ટ અને રણબીર કપૂરને પણ પ્રાણ પ્રતિષ્ઠામાં ભાગ લેવાનું આમંત્રણ મળ્યું છે.

રણદીપ હુડા અને તેની પત્ની લીન લેશરામે સોશિયલ મીડિયા પર આમંત્રણ સાથેની એક તસવીર શેર કરી છે. તમને જણાવી દઈએ કે રણદીપની સાથે તેની પત્નીને પણ ફંક્શનમાં બોલાવવા માટે કહેવામાં આવ્યું છે. સોમવારે રણદીપને અંગત આમંત્રણ મળ્યું અને તેની અને લિનની એક તસવીર સોશિયલ મીડિયા પર વાયરલ થઈ રહી છે.

અયોધ્યામાં રામ મંદિરના અભિષેક માટે 22 જાન્યુઆરીએ એક લાખથી વધુ ભક્તો આવવાની સંભાવના છે. જેમાં ભારતના વડાપ્રધાન નરેન્દ્ર મોદીનું નામ પ્રથમ નંબરે નોંધાયેલું છે. આ ઉપરાંત બોલિવૂડની ઘણી મોટી હસ્તીઓ અને દિગ્ગજ કલાકારો પણ મંદિરના કાર્યક્રમમાં ભાગ લેશે.