દિયા ઔર બાતી હમ ફેમ પ્રાચીના લગ્ન તૂટવાની અણીએ

મુંબઈ, બે વર્ષ પહેલા પોતાના જૂના મિત્ર રોહિત સરોહા સાથે લગ્ન કરનારી ટીવી એક્ટ્રેસ પ્રાચી તહેલાને પતિ સામે દિલ્હી પોલીસમાં ફરિયાદ નોંધાવી છે. પ્રશાંત વિહાર પોલીસ સ્ટેશનમાં પ્રાચીએ ફરિયાદ કરી છે સાથે જ તેણે એક વિડીયો પણ સોંપ્યો છે. જેમાં કથિત રીતે તેનો પતિ રોહિત લાયસન્સ વિનાની ગન વાપરતો જોવા મળે છે. દિલ્હી પોલીસે પણ પુષ્ટિ કરી છે કે, પ્રાચીની ફરિયાદ તેમણે દાખલ કરી છે. મીડિયા રિપોર્ટ મુજબ, પ્રાચીના નજીકના સૂત્રોનું કહેવું છે કે, તે હાલ ખૂબ ભયભીત છે અને પોતાના ઘરમાંથી જરૂર હોય તો જ બહાર નીકળી રહી છે. પ્રાચી તહેલાને મોડી રાત્રે ટ્વિટર પર એક વિડીયો શેર કર્યો હતો.

જેમાં દેશના ગૃહમંત્રી અમિત શાહ, દિલ્હીના મુખ્યમંત્રી અરવિંદ કેજરીવાલ અને દિલ્હી પોલીસને ટેગ કર્યા છે. પ્રાચીના કહેવા મુજબ વિડીયોમાં દેખાતો શખ્સ રોહિત સરોહા છે અને તે ગેરકાયદેસર હથિયાર વડે ફાયરિંગ કરી રહ્યો છે. આ વાયરલ વિડીયોમાં ચારવાર ગોળી છૂટતી દેખાઈ રહી છે. પહેલી નજરે આ ગન ફિલ્મોમાં દેખાતી શોટ ગન જેવી છે. મીડિયા રિપોર્ટમાં ઉલ્લેખ છે કે, આ વિડીયો પોસ્ટ કરવાના એક દિવસ પહેલા જ પ્રાચીએ પ્રશાંત વિહાર પોલીસ સ્ટેશનમાં આ અંગેની લેખિત ફરિયાદ કરી હતી અને પેન ડ્રાઈવમાં આ વિડીયો પણ પોલીસને સોંપ્યો હતો. પ્રાચી તહેલાનના ટ્વિટનો હવાલો આપતાં એક પત્રકારે આ વિડીયો જિમ કોર્બેટ પાર્કનો હોવાનો દાવો કર્યો છે અને ગોળી ચલાવનાર શખ્સની ઓળખ પ્રાચીના પતિ રોહિત સરોહા તરીકે કરી છે.

સાથે જ લખ્યું છે, પ્રાચીએ દિલ્હીના મોડલ ટાઉન પોલીસ સ્ટેશનમાં રોહિત સામે દહેજ માટે ત્રાસ આપવાની ફરિયાદ દાખલ કરી છે. આ ટ્વિટ પરથી અંદાજો લગાવી શકાય છે કે પ્રાચી અને રોહિતના બે વર્ષ જૂના લગ્ન તૂટવાની અણીએ છે. પ્રાચી તહેલાને પોતાની લોકપ્રિય મલયાલમ ફિલ્મ ‘મમંગમ’ના રિલીઝના થોડા દિવસ બાદ જ રોહિત સરોહા સાથે લગ્ન કર્યા હતા. લગ્ન વખતે પ્રાચીએ જણાવ્યું હતું કે, તે અને રોહિત છેલ્લા આઠ વર્ષથી મિત્રો છે. પરંતુ મતભેદોના કારણે તેઓ થોડા વખત માટે અલગ થઈ ગયા હતા. જોકે, કોરાના કાળને લીધે આવેલું અંતર તેમને નિકટ લાવ્યું હતું. પ્રાચીએ તે વખતે કહ્યું હતું,

*વિશ્વાસ કરવો મુશ્કેલ છે કે અમે લાંબા સમય સુધી એકબીજા સાથે વાત નહોતી કરી. આ વખતે જ્યારે ફરીથી તાર જોડાયા ત્યારે રોહિતે બીજા જ દિવસે મને લગ્ન માટે પ્રપોઝ કરી હતી અને અમે લગ્ન કરી લીધા. પ્રાચીએ ટીવીની સુપરહિટ સીરિયલ ‘દિયા ઔર બાતી હમ’ દ્વારા ઓળખ બનાવી હતી. પછી ફિલ્મી પડદે પણ નામ કમાયું. પ્રાચીની ફિલ્મ ‘મમંગમ’ મલયાલમ, તેલુગુ અને હિન્દીમાં રિલીઝ થઈ છે. આ ફિલ્મે ભારતમાં જ નહીં વિદેશમાં પણ સારી કમાણી કરી હતી. આ ફિલ્મ હિટ થતાં જ પ્રાચીના લગ્નના અહેવાલ આવવા લાગ્યા હતા. નેશનલ લેવલની નેટબોલ ખેલાડી રહી ચૂકેલી પ્રાચી તહેલાને મુંબઈ અને દક્ષિણ ભારતીય સિનેમામાં કાઠું કાઢયું છે.