By પશુ હેરાફેરી કરતા તત્વોમાં ફફડાટ ફેલાયો
બનાસકાંઠા જિલ્લામાં પશુઓની ગેરકાયદેસર હેરાફેરીની વધતી જતી ઘટનાઓને ડામવા માટે પોલીસ તંત્ર હરકતમાં આવ્યું છે. ડીસા દક્ષિણ પોલીસ દ્વારા શહેરના પ્રવેશદ્વાર અને સંવેદનશીલ વિસ્તારોમાં રાત્રિ પેટ્રોલિંગ સઘન બનાવી દેવામાં આવ્યું છે.છેલ્લા કેટલાક સમયથી રાત્રિના અંધકારનો લાભ લઈ પશુઓને ક્રૂરતાપૂર્વક ભરીને લઈ જતી ગેંગ સક્રિય થઈ હોવાની બાતમીના આધારે, જિલ્લા પોલીસ વડાની સૂચનાથી ડીસા દક્ષિણ પોલીસ મથકના પી.આઈ. સહિતના પોલીસ કાફલાએ મેદાને ઉતરી તપાસ હાથ ધરી છે. પોલીસ દ્વારા શંકાસ્પદ વાહનો, આઈશર અને ટ્રકોનું ઝીણવટભર્યું ચેકિંગ કરવામાં આવી રહ્યું છે.
ડીસા એ આંતરરાજ્ય અને આંતર જિલ્લા માર્ગોનું મુખ્ય જંકશન હોવાથી અહીંથી પશુઓની હેરાફેરી થવાની શક્યતા વધુ રહેતી હોય છે. જેને પગલે મુખ્ય સર્કલો,અવાવરુ રસ્તાઓ અને શોર્ટકટ માર્ગો પર પણ વોચ રાખવામાં આવી રહી છે.ટેકનિકલ સર્વેલન્સ અને બાતમીદારોને પણ સક્રિય કરવામાં આવ્યા છે.પશુઓ પ્રત્યેની ક્રૂરતા અટકાવવા અને ગેરકાયદે પ્રવૃત્તિઓ ડામવા માટે પોલીસ કટિબદ્ધ છે. કોઈપણ શંકાસ્પદ હિલચાલ જણાયે કાયદેસરની કડક કાર્યવાહી કરવામાં આવશે.તેમ પોલીસ સૂત્રોએ જણાવ્યું છે.ડીસા દક્ષિણ પોલીસની આ સક્રિયતાને પગલે પશુ તસ્કરી કરતા તત્વોમાં ફફડાટ વ્યાપી ગયો છે. સ્થાનિક રહીશો અને જીવદયા પ્રેમીઓએ પોલીસની આ કામગીરીને બિરદાવી છે.
