શાકભાજીના ભાવ વધવાને કારણે મોંઘવારીનો દર વધ્યો, RBI ગવર્નરે કહ્યું કે આ મહિનાથી મળશે રાહત

લોકોને આ મહિને સતત વધી રહેલી મોંઘવારીમાં રાહત મળી શકે છે. રિઝર્વ બેંક ઓફ ઈન્ડિયા (RBI)ના ગવર્નર શક્તિકાંત દાસે આશા વ્યક્ત કરી છે કે આ મહિનાથી છૂટક મોંઘવારી ઘટી શકે છે. તેમણે ટામેટાંની કિંમતમાં ઘટાડો કરવા તેમજ નોન-બાસમતી ચોખાની નિકાસ પરના નિયંત્રણો અને ઘરોમાં વપરાતા ગેસ સિલિન્ડરની કિંમતમાં ઘટાડો કરવાના કેન્દ્રના પગલાંને ટાંકીને આ વાત કહી.

આરબીઆઈ ગવર્નર દેવી અહિલ્યા યુનિવર્સિટી, ઈન્દોરમાં આયોજિત કાર્યક્રમને સંબોધિત કરી રહ્યા હતા. આ પહેલા તેઓ આરબીઆઈના સેન્ટ્રલ બોર્ડની બેઠકમાં પણ સામેલ થયા હતા. RBI ગવર્નરે કહ્યું, ‘એવું અપેક્ષા છે કે સપ્ટેમ્બરથી છૂટક મોંઘવારી દરમાં ઘટાડો શરૂ થશે. જો કે ઓગસ્ટમાં (છૂટક) મોંઘવારીનો દર ઘણો ઊંચો રહેશે, સપ્ટેમ્બરથી મોંઘવારી નીચે આવવાનું શરૂ થઈ શકે છે.

તેમણે કહ્યું કે ટામેટાંના ભાવ પહેલાથી ઘણા ઘટી ગયા છે. આ મહિનાથી અન્ય શાકભાજીના છૂટક ભાવમાં પણ ઘટાડો થવાની ધારણા છે. દાસે કહ્યું કે સરકારે લોકોને પોષણક્ષમ ભાવે ટામેટાં અને સામાન્ય જરૂરિયાતની અન્ય વસ્તુઓનો પુરવઠો સુનિશ્ચિત કરવા માટે ઘણાં પગલાં લીધાં છે. તેમણે કહ્યું, ‘બિન બાસમતી ચોખાની નિકાસ પર નિયંત્રણો લાદવામાં આવ્યા છે. તાજેતરમાં એલપીજી સિલિન્ડરની કિંમતમાં ઘટાડો કરવામાં આવ્યો છે.

સત્તાવાર માહિતી અનુસાર, શાકભાજી સહિતની ખાદ્ય ચીજો મોંઘી થવાને કારણે જુલાઈમાં છૂટક મોંઘવારી વધીને 7.44 ટકા થઇ હતી. છેલ્લા 15 મહિના દરમિયાન આ સર્વોચ્ચ સ્તર હતું. જૂનમાં તે 4.81 ટકા હતો. રિટેલ ફુગાવાનો દર 2 ટકાના તફાવત સાથે 4 ટકા પર રાખવાની જવાબદારી આરબીઆઈને મળી છે. આરબીઆઈ ગવર્નરે કહ્યું, ‘જુલાઈમાં મોંઘવારી દર ઊંચા સ્તરે હતો. આનાથી બધાને આશ્ચર્ય થયું. ટામેટાં અને અન્ય શાકભાજીના ઊંચા ભાવને કારણે અમે જુલાઈમાં તે ઊંચા રહેવાની અપેક્ષા રાખી હતી.