ટ્રસ્ટ સંચાલિત મેડિકલ સ્ટોરની દવા પર હવે GST લાગુ પડશે.

શહેરની નગરી આઈ હોસ્પિટલના ચુકાદામાં અમદાવાદ જીએસટી એડવાન્સ રૂલિંગ ઓથોરિટીએ જણાવ્યું હતું કે, ટ્રસ્ટ દ્વારા રાહત દરે ચલાવાતી દવાની દુકાનો પર પણ જીએસટી લાગુ પડે. આમ હોસ્પિટલમાં ચાલતી દવાની દુકાનો પર જીએસટી લાગુ પડતા દર્દીઓને દવા 5થી 12 ટકા મોંઘી પડશે.

આ દુકાનોએ પણ જીએસટી નંબર લેવો પડશે અને લાગુ પડતો ટેક્સ ભરવો પડશે. આમ આ ચુકાદો આવતા દવાખાનામાં ચાલતી દવાની દુકાનો પર પણ જીએસટી લાગુ પડશે.

તાજેતરમાં ગુજરાત જીએએસટી એડવાન્સ રૂલિંગ ઓથોરિટીએ નગરી આઈ રિસર્ચ ફાઉન્ડેશન દ્વારા સ્પષ્ટતા માગી હતી કે ટ્રસ્ટ દ્વારા હોસ્પિટલમાં ચલાવાતી મેડિકલ શોપ પર જીએસટી લાગુ પડે કે નહીં?

જેનો ચુકાદો આપતા અમદાવાદ એડવાન્સ રૂલિંગ ઓથોરિટીએ જણાવ્યું કે, ટ્રસ્ટ દ્વારા ચલાવાતા મેડિકલ સ્ટોર દ્વારા અપાતી દવાઓ જીએસટી કાયદા હેઠળ વેચાણ ગણવામાં આવે છે. આથી તેના પર જીએસટી લાગુ પડશે. નગરી હોસ્પિટલે પોતાની અરજીમાં જણાવ્યું હતું કે, મેડિકલ દવાની દુકાનમાં સસ્તામાં લોકોને દવા મળી રહે તે માટે જરૂરી વ્યવસ્થા કરે છે. હોસ્પિટલમાં આવતા દર્દીઓને જરૂર પડતી દવાઓ સસ્તા દરે અપાય છે, જેથી આ સેવાકીય પ્રવૃત્તિને જીએસટીમાંથી માફી આપવી જોઈએ.