By મુંબઈ-અમદાવાદ બુલેટ ટ્રેન પ્રોજેક્ટ માટે શિલફાટા અને ઘનસોલી વચ્ચે 4.88 કિલોમીટર લાંબી ટનલનું ખોદકામ શનિવારે સવારે પૂર્ણ થયું. આ પ્રસંગે કેન્દ્રીય રેલ્વે મંત્રી અશ્વિની વૈષ્ણવ પણ હાજર રહ્યા હતા. તેને ઐતિહાસિક સિદ્ધિ ગણાવતા વૈષ્ણવે કહ્યું કે સુરત-બિલીમોરા સેક્શન પર હાઇ-સ્પીડ કોરિડોરનો પ્રથમ તબક્કો ડિસેમ્બર 2027 માં કાર્યરત થશે. મુંબઈ નજીક ઘનસોલીમાં મીડિયા સાથે વાત કરતા કેન્દ્રીય મંત્રીએ કહ્યું કે બુલેટ ટ્રેન મધ્યમ વર્ગ માટે પરિવહનનું માધ્યમ હશે અને તેના ભાડા પણ વાજબી હશે.
રેલવે મંત્રીએ કહ્યું કે ગુગલ મેપ્સ એપ મુંબઈ અને અમદાવાદ વચ્ચેનો મુસાફરીનો સમય 9 કલાક દર્શાવે છે, પરંતુ બુલેટ ટ્રેન સાથે, લોકો આ અંતર ફક્ત 2 કલાક અને 7 મિનિટમાં કાપી શકશે. અશ્વિની વૈષ્ણવે જણાવ્યું હતું કે બુલેટ ટ્રેન પ્રોજેક્ટનો પ્રથમ તબક્કો 2027 માં સુરત-બિલીમોરા સેક્શન પર શરૂ કરવામાં આવશે. તે 2028 માં થાણે સુધી અને 2029 માં બાંદ્રા કુર્લા કોમ્પ્લેક્સ સુધી પૂર્ણ થશે. તેમણે કહ્યું, “ટ્રેનોનું આયોજન એવી રીતે કરવામાં આવ્યું છે કે સવાર અને સાંજના પીક અવર્સ દરમિયાન, દર અડધા કલાકે એક ટ્રેન ઉપડશે. એકવાર આખું નેટવર્ક કાર્યરત થઈ જાય, પછી પીક અવર્સ દરમિયાન દર 10 મિનિટે એક ટ્રેન ઉપલબ્ધ થશે.”
કેન્દ્રીય મંત્રીએ જણાવ્યું હતું કે મુંબઈ અને અમદાવાદ વચ્ચે મુસાફરી માટે રિઝર્વેશનની જરૂર રહેશે નહીં, અને મુસાફરો સ્ટેશન પર જ ટિકિટ ખરીદી શકશે. નોંધનીય છે કે આજે, શિલફાટા અને ઘણસોલી વચ્ચે 4.88 કિલોમીટર લાંબી ટનલના એક છેડે ઉભા રહેલા અશ્વિની વૈષ્ણવે એક બટન દબાવ્યું અને નિયંત્રિત ડાયનામાઈટ વિસ્ફોટથી તેનું છેલ્લું સ્તર તોડી નાખ્યું, જેનાથી લગભગ 5 કિલોમીટર ખોદકામ પૂર્ણ થયું.
નેશનલ હાઇ સ્પીડ રેલ કોર્પોરેશન લિમિટેડ (NHSRCL) એ જણાવ્યું હતું કે ન્યૂ ઓસ્ટ્રિયન ટનલ મેથડ (NATM) નો ઉપયોગ કરીને ખોદવામાં આવેલી આ ટનલ બાંદ્રા-કુર્લા કોમ્પ્લેક્સ (BKC) અને શિલ્ફાટા વચ્ચેના 21 કિલોમીટર લાંબા ભૂગર્ભ વિભાગનો ભાગ છે. આમાં થાણે ક્રીક હેઠળનો 7 કિલોમીટરનો વિભાગ પણ શામેલ છે. મુંબઈ-અમદાવાદ હાઇ-સ્પીડ રેલ કોરિડોર (508 કિમી) ભારતનો પ્રથમ બુલેટ ટ્રેન પ્રોજેક્ટ છે.
