પાલનપુરના દેવપુરામાંથી ચોરાયેલ બે બાઇક સાથે રાજસ્થાનના બે શખસોને ઝડપી લીધા

ધાનેરા પોલીસે ગુરુવારે નેનાવા ચેકપોસ્ટ પરથી પાલનપુરના દેવપુરામાંથી ચોરાયેલ બે બાઇક સાથે રાજસ્થાનના બે શખસોને ઝડપી લીધા હતા. બન્ને શખસોને પાલનપુર પોલીસના હવાલે કર્યા છે.

પીઆઇ એ.ટી.પટેલએ રાજસ્થાન રાજ્ય તરફ જતા રસ્તાઓ અને ચેકપોસ્ટ પર વાહન ચેકીંગ સઘન કરવા માટેના આદેશો આપ્યા છે. જેને લઇ ધાનેરા પોલીસએ નેનાવા ચેકપોસ્ટ પર ગુરુવારે વાહન ચેકીંગ દરમિયાન ધાનેરા તરફથી આવતા બે બાઇક ચાલકોને ઉભા રાખી બાઇક બાબતે પૂછપરછ કરતા બન્ને બાઇક પાલનપુરથી ચોર્યા હોવાની કબૂલાત શખસોએ કરી હતી. ધાનેરા પોલીસએ રાજસ્થાન રાજ્યનાં બાડમેર જિલ્લાનાં સદીકખાન સુલતાનખાન સિંધી અને બિલાલખાન હાજીખાન સિંધીને ઝડપી પાડયા હતા. જે શખસોએ બન્ને બાઇક પાલનપુર દેવપુરા વિસ્તારમાંથી ચોર્યા હોવાની કબૂલાત કરી હતી. બન્ને શખસોને પાલનપુર પોલીસના હવાલે કર્યા છે.