![](https://www.rakhewaldaily.com/wp-content/uploads/2020/09/45412.jpg)
મોટા કાપરા ગામના ૧૫ દિવસથી વિખુટા પડેલા ત્રણ બાળકોનું માતા સાથે મિલન
રખેવાળ ન્યુઝ પાલનપુર : લાખણી તાલુકાના મોટા કાપરા ગામમાં પતિ-પત્ની વચ્ચેના ઘરકંકાસમાં માતા પિયરમાં જતા માતાના વિરહમાં ઝૂરી રહેલા ત્રણ બાળકોનું ૧૮૧ અભિયમની ટીમે તેમની માતા સાથે સુખદ મિલન કરાવ્યું હતું.
બનાસકાંઠા ૧૮૧ અભિયમ મહિલા હેલ્પ લાઇનના કાઉન્સેલર સરોજબેન તુરીએ જણાવ્યું હતુ કે, લાખણી તાલુકાના મોટા કાપરા ગામે એક ઇસમે ઝઘડો કરી ૧ વર્ષ, ૩ વર્ષ અને ૫ વર્ષના ત્રણ સંતાનો પોતાની પાસે રાખી પત્નીને પિયરમાં મોકલી દીધી હતી. આથી સંતાનો માતાના વિરહમાં જુરી રહ્યા હતા. આ અંગેનો કોલ મળતાં મહિલા પોલીસ કોન્સટેબલ સરોજબેન ચૌહાણ સાથે ત્યાં ગયા હતા.
જ્યાં આ મહિલાના પતિ તેમજ તેના પરિવારના સભ્યો અને સગા વ્હાલાઓને સમજાવી ૧૫ દિવસથી વિખુટા પડેલા ત્રણ સંતાનોનું માતા સાથે મિલન કરાવ્યું હતુ. જોકે, મહિલાની તબિયત સારી ન હોવાથી તેને સારવાર માટે દાખલ કરવામાં આવી છે.