ડીસાના ઇન્દિરા નગર ખાતે ગોડાઉનમાં આગ લાગતા મોટું નુકસાન

વાસણ ધોવાના કુચડા બનાવતા યુનિટમાં શોર્ટ સર્કિટથી આગ લાગી: ડીસા શહેરના ઇન્દીરાનગર ધૂળીયાકોટ વિસ્તારમાં આવેલા ગોડાઉનમાં વાસણ ધોવાના કુચડા બનાવતા યુનિટમાં આગ લાગતા મોટું નુકસાન થવા પામ્યું છે. ડીસા નગરપાલિકાના ફાયર વિભાગ દ્વારા આગ બુઝાવવામા આવી હતી.

ડીસાના ઇન્દીરાનગર ધુળીયાકોટ વિસ્તારમાં રહેણાંક વિસ્તારમાં આવેલા એક ગોડાઉનમાં બલરામભાઈ જાટ દ્વારા વાસણ ધોવાના કુચડા બનાવવાનું યુનિટ ચાલી રહ્યું છે. જેમાં મંગળવારે મોડી રાત્રે અચાનક શોર્ટ સર્કિટથી આગ લાગતા અફડા તફડી મચી જવા પામી હતી. આગ લાગવાના કારણે આજુબાજુના રહીશોમાં દોડધામ મચી જવા પામી હતી. આગ લાગવાના સમાચાર મળતા ડીસા નગરપાલિકાના ફાયર વિભાગની ટીમ તાત્કાલિક ફાયર ફાઈટર સાથે ઘટના સ્થળે પહોંચી હતી.

જોકે રહેણાક વિસ્તારમાં ગોડાઉન આવેલું હોવાથી ફાયર વિભાગની ટીમ દ્વારા ગોડાઉનના પતરા તોડી આગ બુઝાવવાની કામગીરી હાથ ધરાઈ હતી. આગ લાગવાના કારણે યુનિટના માલિકને મોટું નુકસાન થવા પામ્યું છે. મોડી રાત્રે ડીસાના ફાયર વિભાગની ટિમ અને સ્થાનિક રહીશોની મદદથી આગ પર કાબુ મેળવવામાં આવ્યો હતો.