![](https://www.rakhewaldaily.com/wp-content/uploads/2022/11/08-1.jpg)
ડીસા સીટ પર કોંગ્રેસે યુવા ચહેરાને તક આપતા જીલ્લાભરના કોંગ્રેસી યુવાનોમાં ઉત્સાહ
બનાસકાંઠા જિલ્લાની ડીસા વિધાનસભા બેઠક પર કોંગ્રેસે આ વખતે માસ્ટર સ્ટ્રોક રમ્યો છે. બેરોજગારી, શિક્ષણ , આરોગ્ય જેવી અનેક સમસ્યાઓથી જિલ્લાના યુવાનો પરેશાન છે, ત્યારે વર્ષોથી ડીસા વિધાનસભાના કોંગ્રેસી કાર્યકરો અને મતદાતાઓની યુવા ચહેરાની માંગણી પાર્ટીએ આ વખતે સ્વીકારી છે. અને ખૂબ જ ઉત્સાહી અને જનકલ્યાણ માટે લડત આપવા યુવા નેતા સંજયભાઈ ગોવાભાઈ રબારીની ડીસા વિધાનસભા માટે કોંગ્રેસે ટીકીટ આપી છે. જેથી ડીસા સહિત સમગ્ર જિલ્લાના યુવાનોમાં કોંગ્રેસ પક્ષ તરફથી ગજબનો ઉત્સાહ જોવા મળી રહ્યો છે. સંજયભાઈ બનાસકાંઠા જિલ્લાના લડાયક ખેડૂત આગેવાન અને પીઢ કોંગ્રેસી નેતા ગોવાભાઇ રબારીના પુત્ર છે. ગોવાભાઈ ડીસા વિધાનસભાના પૂર્વ ધારાસભ્ય છે, ધારાસભ્ય તરીકેના કાર્યકાળ દરમ્યાન પ્રજાના પ્રાણપ્રશ્નોનું નિરાકરણ કરવા તેઓ હરહંમેશ પ્રજા સાથે રહ્યાં હતાં. તેમના આ પ્રજા કલ્યાણના ગુણ તેમનાં પુત્ર સંજય ગોવાભાઈ રબારીમાં પણ ઉતર્યા હતા. સંજયભાઈએ યુથ કોંગ્રેસમાં ખૂબ જ સક્રિય કામગીરી ડીસા સહિત સમગ્ર બનાસકાંઠામાં સારી એવી લોકચાહના મેળવેલ છે .તાજેતરમાં જ તેઓએ યુવા જનઆક્રોશ રેલી નીકાળી યુવાનોની બેરોજગારીનો મુદ્દો ઉઠાવી સરકારને આડે હાથ લીધી હતી. એટલું જ નહીં સંજયભાઈ પણ પિતા ગોવાભાઈની જેમ મિલનસાર સ્વભાવના હોવાથી ડીસાના દરેક ધર્મ, જ્ઞાતિ, સમાજ અને વર્ગના વ્યક્તિઓમાં એક લોકપ્રિય ચહેરો છે. ડીસા મતવિસ્તારના મતદારો તેમજ પક્ષના કાર્યકર્તાઓના નાના મોટા તમામ પ્રસંગે અને મુશ્કેલીમાં પિતા ગોવાભાઈની જેમ જ સંજયભાઈ પણ લોકોની પડખે રહેતા હોય છે. રાજકીય વિશ્લેષકોનું માનીએ તો સંજયભાઈની ખૂબી એ છે કે તે એક યુવા અને નિર્વિવાદીત આગેવાન છે, જેથી આ ચૂંટણીમાં યુવા મતદારો નિર્ણાયક બની ડીસા વિધાનસભામાં પરિવર્તન લાવે તેવી પુરેપુરી સંભાવના છે. સંજયને પ્રતિનિધિત્વ કરવાની તક કોંગ્રેસે આપતાં બનાસકાંઠા જિલ્લાના યુવાનોમાં જબરજસ્ત ઉત્સાહ છે. જિલ્લાના કોંગ્રેસી યુવાનો જ્યારથી સંજયની ટીકીટ જાહેર થઇ છે ત્યારથી જિલ્લાના પ્રત્યેક ગામોમાં ફરી કોંગ્રેસની જીત માટે તનતોડ મહેનત કરી રહ્યા છે,ત્યારે રાજકીય વિશ્લેષકોનું માનવુ છે કે આ વખતે યુવાનોનો ઉત્સાહ પરિવર્તન લાવી શકે છે.