દાંતીવાડા ડેમમાં 17 હજાર ક્યૂસેક પાણીની આવક, ડેમ 57 ટકા ભરાયો

બનાસકાંઠા જિલ્લા સહિત ઉત્તર ગુજરાતમાં ભારે વરસાદની આગાહી કરવામાં આવેલી છે. જિલ્લાના કેટલાક વિસ્તારોમાં સારા વરસાદના પગલે નીચાણ વાળા વિસ્તારોમાં પાણી ભરાયા છે. જોકે જિલ્લામાં અત્યાર સુધી એવરેજ 111.33 ટકા વરસાદ નોંધાયો છે. જેમાં બનાસકાંઠા જિલ્લા જીવાદોરી સમાન ગણાતા દાંતીવાડા ડેમમાં હાલ સવારે 11 વાગ્યાં સુધી 17 હજાર ક્યુસેક પાણીની આવક ચાલુ છે. દાંતીવાડા ડેમનું લેવલ 587.50 ફૂટે પહોંચ્યું છે હાલ ડેમમાં 56.93 ટકા પાણી સંગ્રહ થયો છે. જોકે હજુ સુધી બનાસ નદીમાં પાણી આવવા ના કારણે દાંતીવાડા ડેમમાં પાણીની આવક વધે તેવી શક્યતાઓ છે જેને લઈ ખેડૂતોમાં ખુશી જોવામાં મળી છે.

જિલ્લામાં સારા વરસાદના પગલે તમામ જળાશયો છલોછલ ભરાય તો ખેડૂતો શિયાળો તેમજ ઉનાળામાં ખેતી કરી શકે. જિલ્લામાં છેલ્લા 24 કલાકમાં સાર્વત્રિક વરસાદ નોંધાયો છે, જેમાં અમીરગઢમાં 67 મિમિ, કાંકરેજમાં 40 મિમિ, ડીસામાં 93 મિમિ, થરાદમાં 42 મિમિ, દાંતામાં 34 મિમિ, દાંતીવાડામાં 191 મિમિ, દિયોદરમાં 23 મિમિ, ધાનેરામાં 27 મિમિ, પાલનપુરમાં 131 મિમિ, ભાભરમાં 29 મિમિ, લાખણીમાં 37 મિમિ, વડગામમાં 49 મિમિ, વાવમાં 42 મિમિ, સુઈગામમાં 92 મિમિ વરસાદ નોંધાયો છે.