ઠંડા પરદેશમાં થતી સ્ટ્રોબેરીનો ડીસા પંથકમાં સફળ પ્રયોગ
રખેવાળ ન્યુઝ ડીસા : ડીસાના કૃષિ વિજ્ઞાન કેન્દ્ર દ્વારા જીલ્લામાં પ્રથમવાર સ્ટ્રોબેરીની સફળ ખેતી કરવામાં આવી છે. વાવેતર બાદ સ્ટ્રોબેરીના ફળો આવવાની શરૂઆત થઈ ચૂકી છે અને આગામી દશ દિવસમાં તેના ફળો પાકવા માંડશે અને તેનું ઉત્પાદન પણ શરૂ થઈ જશે.
સ્ટ્રોબેરીની ખેતી આમ તો સામાન્ય રીતે ઠંડા પ્રદેશમાં થતી હોય છે. જેમ કે કશ્મીર, હિમાચલ પ્રદેશ, ખંડલા, મહાબળેશ્વર જેવા ઠંડા અને ઉચ્ચ પ્રદેશમાં સ્ટ્રોબેરીની ખેતી કરવામાં આવે છે. સ્ટ્રોબેરીની ખેતી માટે તાપમાન ખૂબ જ ઓછું હોવું જોઇયે. પરંતુ તમે કલ્પી નહીં શકો કે ડીસા જેવા સૂકા અને રણ પ્રદેશમાં સ્ટ્રોબેરીની સફળ ખેતી કરવામાં આવી હોય.પણ આ વાત સાચી છે. ડીસા ખાતે આવેલા કૃષિ વિજ્ઞાન કેન્દ્રમાં ગત વર્ષે સ્ટ્રોબેરીના ૧૫૦૦ છોડનું વાવેતર ડિસેમ્બરમાં કરવામાં આવ્યું હતું. કૃષિ વિજ્ઞાન કેન્દ્ર દ્વારા જે ૧૫૦૦ છોડનું વાવેતર કરવામાં આવ્યું હતું તે વાવેતર બે પધ્ધતિથી કરવામાં આવ્યું હતું. આ વાવેતર ઓર્ગેનિક અને રસાયણિક પધ્ધતિથી કરવામાં આવ્યું હતું અને અત્યારે આ બંને પધ્ધતિથી કરવામાં આવેલા વાવેતરમાં ફળો આવવાની શરૂઆત થઈ ચૂકી છે અને આગામી દશ દિવસમાં આ છોડ પર સ્ટ્રોબેરીના ફળોના ઉત્પાદન પણ શરૂ થઈ જશે. આ બાબતે કૃષિ વિજ્ઞાન કેન્દ્ર, ડીસાના યોગેશ પવારે જણાવ્યું હતું કે સ્ટ્રોબેરીની ડીસામાં કરવામાં આવેલી સફળ ખેતી ખરેખર કરિશ્મા સમાન છે.કારણ કે ડીસાનું હવામાન સૂકું છે. પરંતુ તેમ છતાં ડીસામાં ઠંડી ખૂબ જ વધારે પડતી હોવાના લીધે સ્ટ્રોબેરીની ખેતી કરવામાં સફળતા મળી છે. ત્યારે બનાસકાંઠા જિલ્લાના ખેડૂતો જે હવે રવિ સિઝનમાં પાક બદલવાનું વિચારી રહ્યા છે તેમના માટે સ્ટ્રોબેરીની ખેતી આગામી સમયમાં ખૂબ જ સારો વિકલ્પ સાબિત થઈ શકે છે.
અહેવાલ : નરસિંહ લોઢા