મોડાસાના કોલીખડ પાસે કારનું ટાયર ફાટતા અકસ્માત : બેને સામાન્ય ઇજા પહોંચી

ચાલુ વાહને કેટલીક વખત ટેક્નિકલ કારણોસર અકસ્માતો સર્જાતા હોય છે. જેમાં અન્ય નિર્દોષ વાહનોને પણ ભોગ બનવું પડે છે. આવી જ એક ઘટના અરવલ્લી જિલ્લાના મોડાસામાં સામે આવી છે.

આજે સાંજના સુમારે મોડાસા પાસે અમદાવાદ રોડ પર એક કારચાલક પસાર થઈ રહ્યો હતો. રોડ પર ટ્રાફિક પણ ફૂલ હતો તેવામાં અચાનક કારનું ટાયર ફાટતા કાર આગળ જતી એક એસટી બસ પાછળ અથડાઈ હતી. પાછળ આવી રહેલા અન્ય એક કાર અને બોલેરો જીપ પણ એકબીજા સાથે અથડાયા હતા. આ ચાર વાહનોના એક સાથે થયેલા અકસ્માતમાં બે લોકોને ઇજા થઇ હતી. બંને ઇજાગ્રસ્તોને સારવાર અર્થે હોસ્પિટલ ખસેડાયા હતા. ફૂલ ટ્રાફિક વચ્ચે એકસાથે ચાર વાહનોના અકસ્માતને લઈ મોડાસા-ધનસુરા રોડ પર ભારે ટ્રાફિકજામ થયો હતો. લગભગ બે કિલોમીટર લાંબી વાહનોની લાઈનો લાગી હતી. મોડાસા પોલીસે ઘટનાસ્થળે દોડી આવી ટ્રાફિક પૂર્વવત કરાવ્યો હતો.