અદાણી સિમેન્ટ અને CREDAI વચ્ચે કરાર : ભારતમાં ટકાઉ અને ઉચ્ચ-ગુણવત્તાવાળા બાંધકામના નવા યુગનો પ્રારંભ

દેશના સૌથી મોટા સિમેન્ટ ઉત્પાદક અને રિયલ એસ્ટેટ ડેવલપર્સની સર્વોચ્ચ સંસ્થાએ મિલાવ્યા હાથ : ૧૩,૦૦૦થી વધુ ડેવલપર્સને મળશે અદાણીના ગ્રીન કોંક્રિટ સોલ્યુશન્સ અને R&D કુશળતાનો લાભ : બદલાતા સિમેન્ટ બજારમાં B2B માંગને મળશે વેગ

ભારતના બાંધકામ ઉદ્યોગમાં એક મહત્વપૂર્ણ અને ઐતિહાસિક પગલું ભરવામાં આવ્યું છે. દેશના અગ્રણી સિમેન્ટ ઉત્પાદક અદાણી સિમેન્ટ અને ભારતના ખાનગી રિયલ એસ્ટેટ ડેવલપર્સની સર્વોચ્ચ સંસ્થા કન્ફેડરેશન ઓફ રિયલ એસ્ટેટ ડેવલપર્સ’ એસોસિએશન્સ ઓફ ઇન્ડિયા (CREDAI) એ શુક્રવારે ભારતમાં ટકાઉ અને ઉચ્ચ-ગુણવત્તાવાળા બાંધકામને વેગ આપવા માટે એક વ્યૂહાત્મક જોડાણની જાહેરાત કરી છે. આ જોડાણ બંને સંસ્થાઓ તેમજ સમગ્ર બાંધકામ ઉદ્યોગ માટે લાભદાયી પૂરવાર થશે.
આ સહયોગ હેઠળ, અદાણી સિમેન્ટ તેની B2B (બિઝનેસ-ટુ-બિઝનેસ) પહોંચને મજબૂત કરવા માટે CREDAI ના ૧૩,૦૦૦ થી વધુ ડેવલપર્સના રાષ્ટ્રવ્યાપી નેટવર્ક નો લાભ લેશે. બીજી તરફ, CREDAI સભ્યોને અદાણી સિમેન્ટના ઉદ્યોગ-અગ્રણી સોલ્યુશન્સ, પ્રીમિયમ ઉત્પાદનો અને તકનીકી કુશળતાનો સીધો લાભ મળશે, જે તેમને ઉચ્ચ-ગુણવત્તાવાળા અને ટકાઉ શહેરી વિકાસ પ્રોજેક્ટ્સ હાથ ધરવામાં મદદ કરશે.

આ ઐતિહાસિક કરાર પર ગોવાના મુખ્યમંત્રી પ્રમોદ સાવંતની હાજરીમાં, પાણજીમમાં યોજાયેલી CREDAI ગવર્નિંગ કાઉન્સિલ મીટિંગ દરમિયાન હસ્તાક્ષર કરવામાં આવ્યા હતા. આ પ્રસંગે ઉદ્યોગ મંડળના હોદ્દેદારો અને દેશભરના અગ્રણી ડેવલપર્સ પણ હાજર રહ્યા હતા.અદાણી ગ્રુપના સિમેન્ટ બિઝનેસના સીઈઓ વિનોદ બહેતીએ આ જોડાણ અંગે ઉત્સાહ વ્યક્ત કરતા જણાવ્યું હતું કે, “CREDAI સાથેની અમારી વિશેષ ભાગીદારી ટકાઉ અને નવીન બાંધકામ દ્વારા રાષ્ટ્ર નિર્માણ પ્રત્યે અદાણી સિમેન્ટની પ્રતિબદ્ધતાનો પુરાવો છે. CREDAI સાથે હાથ મિલાવીને, અમારો હેતુ ભારતના રિયલ એસ્ટેટ ક્ષેત્રમાં વિશ્વ-કક્ષાના સિમેન્ટ ઉત્પાદનો અને ગ્રીન કોંક્રિટ સોલ્યુશન્સ અપનાવવાને વેગ આપવાનો છે.”તેમણે વધુમાં જણાવ્યું કે આ સહયોગ અદાણી સિમેન્ટના હરિયાળા, સ્માર્ટ શહેરી ભવિષ્યના નિર્માણના વિઝન સાથે સંપૂર્ણ રીતે સુસંગત છે. આ વિઝનમાં અદાણી સિમેન્ટની તકનીકી કુશળતા અને CREDAI નો જમીની અનુભવ મજબૂત, સુરક્ષિત અને વધુ ટકાઉ માળખાં બનાવવા માટે એકસાથે આવે છે.

આ સહયોગથી CREDAI ના સભ્ય ડેવલપર્સને વિવિધ પરિમાણોમાં તેમના પ્રોજેક્ટની ગુણવત્તા સુધારવાનો લાભ મળશે. જેમાં અદાણી સિમેન્ટના નવીન કોંક્રિટ સોલ્યુશન્સની ઉપલબ્ધતા, તેમજ અદાણીના વૈવિધ્યસભર રેડી-મિક્સ કોંક્રિટ (RMX) અને અદ્યતન કોંક્રિટ સોલ્યુશન્સની ઉપલબ્ધતાનો સમાવેશ થાય છે, જે પ્રમાણભૂત ગ્રેડથી લઈને વિશિષ્ટ મિશ્રણ સુધીની વિવિધ જરૂરિયાતોને અનુરૂપ છે.બહેતીએ ભારપૂર્વક જણાવ્યું હતું કે, “અમે CREDAI સભ્યો સાથે નજીકથી કામ કરવા અને તેમને અમારી શ્રેષ્ઠ સામગ્રી અને R&D ક્ષમતાઓ સાથે ટેકો આપવા માટે ઉત્સાહિત છીએ, જે આખરે ઘરમાલિકોને શ્રેષ્ઠ મૂલ્ય પ્રદાન કરશે અને ભારતના વિકાસ ગાથામાં યોગદાન આપશે.” જોકે, ઝડપી શહેરીકરણ અને માળખાકીય વિકાસે B2B માંગમાં જબરદસ્ત ઉછાળો લાવ્યો છે. મોટા રિયલ એસ્ટેટ ડેવલપમેન્ટ્સ અને જાહેર માળખાકીય પ્રોજેક્ટ્સ હવે અસાધારણ ગતિએ સિમેન્ટ વપરાશને આગળ ધપાવી રહ્યા છે. સરકાર દ્વારા સંચાલિત ધોરીમાર્ગો, મેટ્રો સિસ્ટમ્સ અને સ્માર્ટ શહેરોનું નિર્માણ, ખાનગી ક્ષેત્રના ઉચ્ચ-વૃદ્ધિશીલ વિકાસની સાથે, ‘નોન-ટ્રેડ’ સેગમેન્ટના વેગમાં યોગદાન આપી રહ્યું છે, જે એક સમયે IHB-પ્રભુત્વ ધરાવતા બજારને ધીમે ધીમે સંતુલિત કરી રહ્યું છે. આ જોડાણ ભારતના બાંધકામ ક્ષેત્રના ભવિષ્યને નવી દિશા આપશે તે નિશ્ચિત છે.