By બનાસકાંઠા જિલ્લાના ડીસા ખાતે આમ આદમી પાર્ટી (આપ) દ્વારા યોજાયેલા સ્નેહમિલન કાર્યક્રમે ઉત્તર ગુજરાતના રાજકારણમાં એક નવી ચેતના અને સંગઠનની મજબૂતીનો સંકેત આપ્યો છે. વર્ધમાન વિહારધામ ચાર રસ્તા ખાતે મોટી સંખ્યામાં પાર્ટીના કાર્યકરો અને નવા જોડાનારા સભ્યોની ઉપસ્થિતિમાં આ કાર્યક્રમ સંપન્ન થયો હતો.
આ સ્નેહ મિલન કાર્યક્રમમાં આમ આદમી પાર્ટીના નોર્થ ઝોન પ્રમુખ ડૉ. રમેશભાઈ પટેલની વિશેષ ઉપસ્થિતિ રહી હતી. તેમણે પોતાના સંબોધનમાં ગુજરાતમાં છેલ્લા 30 વર્ષથી ચાલી રહેલા ભાજપના શાસનમાંથી પ્રજાને મુક્ત કરાવવા માટે સંગઠનને વધુ મજબૂત બનાવવા પર ભાર મૂક્યો હતો.ઉત્તર ગુજરાતમાં યોજાનારી મહાપંચાયતની તૈયારીઓ અંગેની ચર્ચા કરી હતી. હાલ રાજ્યમાં ખેડૂતોને પરેશાન કરી રહેલી “કડદા પ્રથા” સામે આમ આદમી પાર્ટીએ આક્રમક વલણ અપનાવ્યું છે.
સુરેન્દ્રનગર બાદ હવે ઉત્તર ગુજરાતમાં મહાપંચાયત યોજવાની તૈયારી હાથ ધરાઈ છે.આ મહાપંચાયત આગામી 16 તારીખે ડીસા ખાતે યોજાશે.આ મહાપંચાયતમાં ખેડૂતોના હિત માટે મહત્વના નિર્ણયો લેવામાં આવશે અને ખેડૂતલક્ષી મુદ્દાઓ પર સરકારને ઘેરવામાં આવશે. સ્નેહમિલન કાર્યક્રમમાં સંગઠન મજબૂત કરવા ઉપરાંત સ્થાનિક સ્વરાજ્ય અને નગરપાલિકાની આગામી ચૂંટણીઓની તૈયારીઓ અંગે પણ વિગતવાર ચર્ચા કરવામાં આવી હતી. આ બેઠક સ્પષ્ટ સંકેત આપે છે કે ‘આમ આદમી પાર્ટી’ ઉત્તર ગુજરાતમાં પોતાનો જનાધાર મજબૂત કરવા અને આગામી ચૂંટણીઓમાં સત્તાધારી પક્ષને પડકાર આપવા માટે કમર કસી રહી છે. આમ, ડીસામાં યોજાયેલા આ સ્નેહમિલન કાર્યક્રમ થકી આમ આદમી પાર્ટીએ ઉત્તર ગુજરાતના રાજકારણમાં એક મજબૂત હાજરી નોંધાવી છે, જે આવનારા સમયમાં રાજકીય ગતિવિધિઓને વેગ આપી શકે છે.
