દીપેશની હોમ લોન ચૂકતે થતાં પત્નીએ માન્યો આભાર

મુંબઈ, સીરિયલ ‘ભાભીજી ઘર પર હૈ’ના એક્ટર દીપેશ ભાન હવે આપણી વચ્ચે નથી રહ્યા. ૨૩ જુલાઈ ૨૦૨૨ના રોજ ક્રિકેટ રમતી વખતે દીપેશ ઢળી પડ્યા હતા. તેમને તાત્કાલિક હોસ્પિટલ લઈ જવાયા હતા અને ત્યાં ડૉક્ટરોએ તેમને મૃત જાહેર કર્યા હતા. એક્ટરના મોતનું કારણ બ્રેન હેમરેજ હોવાનું જણાવાયું હતું. દીપેશનું એકાએક અવસાન થતાં તેમની પત્ની અને એક વર્ષનો દીકરો નિઃસહાય થયા હતા. હવે સ્વર્ગસ્થ દીપેશ ભાનના પરિવાર તરફથી રાહતના સમાચાર આવી રહ્યા છે. દીપેશના અવસાન બાદ તેમની પત્ની પર મોટી રકમની લોન ચૂકવવાની જવાબદારી આવી પડી હતી. જે હવે ચૂકવાઈ ગઈ છે.

દીપેશ ભાનની પત્ની નેહાએ આ વાતની જાણકારી સોશિયલ મીડિયા પર આપી છે. નેહાએ દીપેશના ઈન્સ્ટાગ્રામ અકાઉન્ટ પરથી એક વિડીયો શેર કર્યો છે. જેમાં તેઓ કહી રહ્યા છે કે, તેમના જીવનની મોટી ચિંતા દૂર થઈ ગઈ છે. નેહાએ જણાવ્યું કે, હોમ લોન ચૂકવાઈ ગઈ છે અને તેના માટે તે દિલથી એક્ટ્રેસ સૌમ્યા ટંડનનો આભાર માને છે. નેહાએ સૌમ્યા ઉપરાંત ‘ભાભીજી ઘર પર હૈ’નાં પ્રોડ્યુસર બેનિફર કોહલીનો પણ આભાર માન્યો છે. મુશ્કેલની ઘડીમાં સૌમ્યા અને બેનિફર કોહલીએ નેહાની ખૂબ મદદ કરી છે.

વિડીયો શેર કરતાં નેહાએ કેપ્શનમાં લખ્યું, સૌમ્યા ટંડન અને બેનિફર કોહલીનો ખૂબ ખૂબ આભાર. જે લોકોએ દાન આપ્યું છે તે સૌનો પણ આભાર. તમે સૌ દેવદૂત બનીને આવ્યા છો. ઈશ્વર હંમેશા તમારી સાથે રહે. સૌને પ્રેમ.” વધુમાં વધુ લોકો સુધી આ વિડીયો પહોંચી શકે તે માટે જ વિડીયો દીપેશના અકાઉન્ટ પરથી શેર કર્યો છે તેમ પણ નેહાએ જણાવ્યું છે. સૌમ્યાએ આ વિડીયો પર કોમેન્ટ કરતાં લખ્યું, “ખૂબ વહાલ. મને ખાતરી છે કે ત્યાં ઉપર ક્યાંક દીપેશ ખૂબ ખુશ હશે.

જણાવી દઈએ કે, સ્વર્ગસ્થ અભિનેતા દીપેશ ભાનનો પરિવાર હોમ લોનના લીધે દેવામાં ડૂબેલો હતો. ત્યારે ‘ભાભીજી ઘર પર હૈ’માં અનિતા ભાભીનો રોલ કરી ચૂકેલી એક્ટ્રેસ સૌમ્યા ટંડને સોશિયલ મીડિયા પર એક વિડીયો શેર કરીને પોતાના ફેન્સ અને ફોલોઅર્સને ૫૦ લાખ રૂપિયાનું ભંડોળ એકત્ર કરવાની વિનંતી કરી હતી. તેણે જણાવ્યું હતું કે આ ભંડોળની બધી જ રકમ દીપેશ ભાનની પત્નીને આપવામાં આવશે અને તેના થકી તેઓ એક્ટરે લીધેલી હોમ લોન ચૂકતે કરશે.