![nepal women cricket](https://www.rakhewaldaily.com/wp-content/uploads/2022/06/cricket-team.jpg)
માત્ર 8 રનમાં આખી ટીમ થઈ ગઈ તંબૂ ભેગી, વિરોધી ટીમ 7 બોલમાં મેચ જીતી ગઈ
કોઈ ટીમ આખરે કેટલા ઓછા સ્કોર પર ઓલઆઉટ થઈ શકે છે? જો આવો સવાલ તમારા મનમાં હોય તો એક ચોંકાવનારો જવાબ મળ્યો છે. નેપાળની અંડર-19 (nepal under 19 team) મહિલા ટીમ માત્ર 8 રનના સ્કોર પર ઓલઆઉટ થઈ ગઈ હતી. વિરોધી ટીમે માત્ર બે ઓવરમાં જ આ લક્ષ્યાંક હાંસલ કરી લીધો હતો. ઉલ્લેખનીય છે કે, અંડર-19 મહિલા વર્લ્ડ કપના એશિયા ક્વોલિફાયરમાં નેપાળની ટીમ (women cricket team) યુનાઈટેડ આરબ અમીરાત (UAE) સામે ટકરાઈ હતી.
6 બેટર્સ ખાતું પણ ના ખોલાવી શક્યા
બાંગીમાં રમાયેલી આ મેચમાં નેપાળે ટોસ જીતીને પ્રથમ બેટિંગ કરવાનો નિર્ણય લીધો હતો, પરંતુ આ નિર્ણય કદાચ દુઃસ્વપ્ન સાબિત થયો હતો. નેપાળ માટે સ્નેહા મહારાએ સૌથી વધુ 3 રન બનાવ્યા, તે 10 બોલ રમી શકી હતી. ટીમના કુલ 6 બેટર્સ ખાતું પણ ખોલાવી શક્યા ન હતા. UAE માટે માહિકા ગૌરે 4 ઓવરના ક્વોટામાં 5 વિકેટ લીધી હતી. માહિકાએ 2 ઓવર મેડન નાખી અને કુલ 4 ઓવરમાં માત્ર 2 રન આપ્યા હતા.
UAEએ માત્ર 7 બોલમાં આ લક્ષ્યાંક મેળવ્યો
માહિકા ઉપરાંત ઈન્દુજા કુમારે 6 રનમાં 3 વિકેટ ઝડપી હતી. સમાયરાને એક વિકેટ મળી, તેણે મેચમાં માત્ર આ એક જ બોલ ફેંક્યો હતો. આ રીતે નેપાળની આખી ટીમ 8 ઓવરમાં 8 રનના સ્કોર પર ઓલઆઉટ થઈ ગઈ હતી. જવાબમાં UAEએ આ લક્ષ્ય માત્ર 7 બોલમાં એટલે કે 1.1 ઓવરમાં હાંસલ કરી લીધું હતું.
ઈન્ટરનેશનલ ટી20 ક્રિકેટમાં સૌથી ઓછા સ્કોરનો રેકોર્ડ તુર્કીના નામે
ટીમે 113 બોલ બાકી રહેતા આ લક્ષ્યાંક હાંસલ કર્યો હતો અને એકપણ વિકેટ ગુમાવી ન હતી. જો ઈન્ટરનેશનલ ટી20 ક્રિકેટમાં સૌથી ઓછા સ્કોર વિશે વાત કરીએ તો આ રેકોર્ડ તુર્કીના નામે છે. તુર્કીની મેન્સ ટીમ ચેક રિપબ્લિક સામે માત્ર 21ના સ્કોર પર ઓલઆઉટ થઈ ગઈ હતી. આ રેકોર્ડ 30 ઓગસ્ટ 2019ના રોજ બન્યો હતો.
Tags women cricket team