પાણીની તંગી: છોકરાઓ રહી જાય છે કુંવારા – કાર્ડ બતાવો તો જ મળે છે જળ

ઉત્તર પ્રદેશ અને મધ્યપ્રદેશની સરહદ પર આવેલા મિર્ઝાપુરના લહુરિયાદાહ ગામને પાણીની અછત વારસામાં મળી છે. જેવી રીતે કાર્ડથી રાશન મળે છે, તેવી જ રીતે અહીં કાર્ડ બતાવીને 3 દિવસે 15 લીટર પાણી મળે છે. જો આનાથી વધુ પાણીની જરૂર પડે તો એક ઝરણા સુધી જવું પડે છે. ત્યાંથી પાણી ભરીને માથા પર લાદીને ઘરે લાવવું પડે છે. પાણીની આટલી અછત જોઈને લોકો પોતાની દીકરીઓના લગ્ન આ ગામના છોકરાઓ સાથે નથી કરતા. તેથી જ મોટાભાગના ઘરોમાં કુંવારા છોકરાઓ જોવા મળે છે.

આ ગામની વસ્તી લગભગ 2 હજાર

જિલ્લા મુખ્યાલયથી લગભગ 70 કિમી દૂર સ્થિત હલિયા વિકાસ બ્લોકનું લહુરિયાદહ ગામ પછાત વિસ્તારમાં સામેલ છે. અહીંની આ કહાની પેઢી દર પેઢી ચાલી આવી રહી છે. આ ગામની વસ્તી લગભગ 2 હજાર છે. ગામડાના લોકોને કાર્ડથી જ રાશન મળે છે અને કાર્ડ દ્વારા જ પાણી આપવામાં આવે છે. ફરક માત્ર એટલો છે કે દર મહિને 3 કિલો રાશન મળે છે અને દરરોજ 5 લિટર પાણી મળે છે.

ટેન્કરમાંથી માત્ર 15 લીટર પાણી આપવામાં આવે છે

ગામમાં પાણીની અછતને જોતા ટેન્કર દ્વારા પાણી પહોંચાડવામાં આવી રહ્યું છે. આ પણ 3 દિવસમાં માત્ર એક જ વાર આવે છે. એક વ્યક્તિના કહેવા મુજબ ટેન્કરમાંથી માત્ર 15 લીટર પાણી આપવામાં આવે છે. આ માટે લોકોએ ટેન્કરની રાહ જોવી પડે છે. જ્યારે પુરૂષો પાણીની રાહ જુએ છે, ત્યારે કામ છૂટી જાય છે. જ્યારે તેઓ કામ પર જાય છે, ત્યારે પાણી માટેની વ્યવસ્થા કરવી મુશ્કેલ બની જાય છે. તેથી, મોટાભાગની મહિલાઓ પાણીની વ્યવસ્થાનું ધ્યાન રાખે છે. ક્યારેક અહીં ઝઘડા પણ થાય છે.

ઝરણામાંથી પાણી ભરવા મજબૂર લોકો

આ ગામના લોકો ઘરથી લગભગ 4 કિમી દૂર પર્વતીય ઝરણામાંથી પાણી ભરવા મજબૂર છે. વરસાદમાં પાણી બરાબર મળે છે. અન્ય મહિનામાં પાણી ઓછું થઈ જાય છે. ત્યાર પછી જ્યારે પર્વત પરથી ધીમે ધીમે પાણી પૂલમાં આવે ત્યારે લોકો પાણી પોતાના ડબ્બામાં ભરે છે. ગામમાં પાણીની અછતના કારણે અનેક છોકરાઓના લગ્ન નથી થતા. આ ગામમાં કોઈ પોતાની દીકરીના લગ્ન કરવા નથી ઈચ્છતું. અહીં આઝાદી બાદ આજદિન સુધી કોઈપણ સરકાર પાણીની સમસ્યાનો અંત લાવી શકી નથી. ચૂંટણી વખતે આવેલા નેતાઓ વચનો આપે છે પણ કોઈ ફાયદો થતો નથી.

ઝરણામાં પણ પાણીનું સ્તર નીચું થયું

અર્જુન, દીનદયાળ, કેશવ, મોહન લાલ, હીરા લાલ, શિવરતન, ઝાલર, રામ સિહોદર અને રામજસે જણાવ્યું કે પૂર્વજોના સમયથી આ સમસ્યા ચાલી રહી છે. લોકો પહેલા ઝરણા પર નિર્ભર હતા. ધીમે ધીમે ઝરણામાં પણ પાણીનું સ્તર નીચું આવતાં પાણીનો પ્રવાહ ધીમો પડી રહ્યો છે. જેથી સમસ્યા વધી રહી છે. મુખ્ય વિકાસ અધિકારી શ્રીલક્ષ્મી વી.એસ. અનુસાર, ડુંગરાળ વિસ્તારમાં આવેલા લહુરિયાદહ ગામમાં 7થી 8 ટેન્કર દ્વારા પાણી પહોંચાડવામાં આવી રહ્યું છે.