IPL બાદ પંચાયતની ચૂંટણીમાં ફરજ નીભાવતો જોવા મળ્યો ધોની!

ઈન્ડિયન પ્રીમિયર લીગ-2022માં ચાર વખતની ચેમ્પિયન ચેન્નાઈ સુપર કિંગ્સ પ્લેઓફમાં પણ પહોંચી શકી નથી, તેથી કેપ્ટન મહેન્દ્ર સિંહ ધોની જલ્દી ઘરે પરત ફર્યો છે. આ દરમિયાન, સોશિયલ મીડિયા પર એક તસવીર સામે આવી છે, જેમાં મહેન્દ્ર સિંહ ધોની જેવો વ્યક્તિ પંચાયત ચૂંટણીમાં ફરજ બજાવી રહ્યો છે.

ધોની જેવો જ દેખાય છે વિવેક

ઉલ્લેખનીય છે કે ઝારખંડમાં અત્યારે પંચાયતની ચૂંટણી ચાલી રહી છે. દરમિયાન, લોકો અહીં ફરજ બજાવતા વ્યક્તિને મહેન્દ્ર સિંહ ધોની તરીકે સમજી રહ્યા છે. કારણ કે તેનો ચહેરો મહેન્દ્ર સિંહ ધોની સાથે અમુક અંશે મળી રહ્યો છે. આ વ્યક્તિનું નામ વિવેક કુમાર છે, જે CCLમાં આસિસ્ટન્ટ મેનેજર તરીકે પોસ્ટેડ છે.

વિવેક સાથે લોકો પડાવી રહ્યા છે તસવીરો

આ દરમિયાન વિવેક કુમાર રાંચીમાં ત્રીજા તબક્કાની પંચાયત ચૂંટણીમાં ફરજ પર હતા. એમએસ ધોની જેવા દેખાતા વિવેક કુમારને મળવા લોકો ત્યાં પહોંચી રહ્યા છે અને સાથે તસવીરો પડાવી રહ્યા છે. વિવેક કુમારની તસવીરો પણ સોશિયલ મીડિયા પર વાયરલ થઈ રહી છે. જો આપણે અસલી મહેન્દ્ર સિંહ ધોનીની વાત કરીએ તો, એમએસ ધોનીએ IPL 2022ની શરૂઆતમાં ચેન્નાઈ સુપર કિંગ્સની કેપ્ટન્સી છોડી દીધી હતી. પરંતુ બાદમાં તેણે ફરીથી કેપ્ટનશીપ સંભાળી, કારણ કે રવિન્દ્ર જાડેજાએ કેપ્ટનશીપ અધવચ્ચે જ છોડી દીધી હતી.

2023માં પણ IPL રમતો જોવા મળશે ધોની

ચેન્નાઈ સુપર કિંગ્સ આ સિઝનમાં પોઈન્ટ ટેબલમાં નવમા નંબરે છે. જો કે, મહેન્દ્ર સિંહ ધોનીના ફેન્સ માટે સારા સમાચાર એ છે કે તે આગામી સિઝનમાં પણ IPLમાં રમતો જોવા મળશે. એમએસ ધોનીએ સ્પષ્ટ કર્યું કે તે IPL 2023માં પણ જોવા મળશે, તે તેની છેલ્લી મેચ ચેન્નાઈમાં જ રમવા માંગે છે.