ઉત્તર ગુજરાતમાં ચોમાસામાં સામાન્યથી 35થી 65% વધુ વરસાદ થશે

ભારતીય હવામાન વિભાગે ગુરૂવારે ચોમાસાની લાંબાગાળાની આગાહી કરી હતી. જે મુજબ પેસીફિક મહાસાગરમાં લા-નીના સિસ્ટમની અસરના કારણે દેશભરમાં સરેરાશ ચોમાસુ સામાન્ય રહેશે. જેમાં ઉત્તર ગુજરાતમાં ચોમાસામાં સામાન્યથી વધુ વરસાદ થવાની શક્યતા વ્યક્ત કરી છે.

હવામાન વિભાગે કરેલી આગાહી મુજબ, ઉત્તર ગુજરાતના મોટાભાગના વિસ્તારોમાં આગામી ચોમાસામાં એટલે કે, જૂન થી સપ્ટેમ્બર મહિના સુધીમાં સરેરાશ સામાન્ય કરતાં વધુ વરસાદ રહેવાની શક્યતા છે. એટલે કે 35%થી 65% વધુ વરસાદ વરસી શકે છે. જેમાં મહેસાણા જિલ્લામાં સામાન્યથી 45% થી 65% વધુ વરસાદ થવાની શક્યતા વ્યક્ત કરાઇ છે.

જ્યારે પાટણ, બનાસકાંઠા, સાબરકાંઠા અને અરવલ્લી જિલ્લામાં સામાન્યથી 35%થી 55% વધુ વરસાદ થવાની શક્યતા છે. બીજી બાજુ સ્કાયમેટ દ્વારા કરાયેલી આગાહી મુજબ, ચાલુ સાલે ચોમાસામાં સામાન્ય કરતાં ઓછો વરસાદ થઇ શકે છે.