ભારતને આંચકો, પી વી સિંધૂનો સેમિફાઈનલમાં પરાજય, બ્રોન્ઝ માટે રમશે

ભારતની સુપર્બ સિંધૂનો બેડમિન્ટન સેમિફાઈનલ મેચમાં પરાજય થતા ભારતને જોરદાર ઝાટકો લાગ્યો છે. શનિવારે સિંધૂની સેમિફાઈનલમાં ટક્કર ચાઈનીઝ તાઈપેઈની ખેલાડી તાઈ ઝૂ સામે થઈ હતી. રિયો ઓલિમ્પિકમાં સિલ્વર મેડલ જીતનાર સિંધૂ પાસેથી દેશને આ વર્ષે ગોલ્ડ મેડલ જીતવાની અપેક્ષા હતી પરંતુ સિંધૂનો બે સીધા સેટમાં 18-21, 12-21થી પરાજય થતા ભારતની ગોલ્ડ કે સિલ્વરની આશા પર પાણી ફરી વળ્યું છે. હવે સિંધૂ બ્રોન્ઝ મેડલ માટે રમશે.

અગાઉ ક્વાર્ટર ફાઈનલમાં જાપાનની યામગુચીને હરાવીને સિંધૂ સેમિફાઈનલમાં પ્રવેશતા ભારતને તેની પાસેથી ઓલિમ્પિકમાં વધુ એક મેડલની આશા હતી. તાઈ ઝૂએ શરૂઆતથી જ આક્રમક રમતનું પ્રદર્શન કર્યું હતું અને પ્રથમ સેટમાં સિંધૂએ તેને બરોબર ટક્કર આપી હતી અને સેટ 18-21થી હારી હતી. બીજા સેટમાં ઝૂની શાનદાર સ્મેશ અને લો ડ્રો ડાઉન શોટ સામે સિંધૂને સંઘર્ષ કરવો પડ્યો હતો અને અંતે 12-21થી પરાજય થયો હતો. તાઈ ઝૂ યિંગ વર્લ્ડ રેન્કિંગમાં પ્રથમ ક્રમ ધરાવે છે જ્યારે સિંધૂ સાતમાં ક્રમે છે. બ્રોન્ઝ મેડલમાં સિંધૂનો મુકાબલો 1 ઓગસ્ટના ચીનની હે બિંગ જિઆઓ સામે થશે.