By બનાસકાંઠા જિલ્લાના ડીસા ખાતે આવેલી જાણીતી શૈક્ષણિક સંસ્થા મોર્ડન સ્કૂલમાં ગત શનિવારે ગુજરાત સરકારના મંત્રી રિવાબા જાડેજાએ ઓચિંતી મુલાકાત લીધી હતી. આ મુલાકાત દરમિયાન તેમણે ખાસ કરીને ગર્લ્સ હોસ્ટેલમાં રહેતી દીકરીઓની સુખાકારી અને વ્યવસ્થાઓનું નિરીક્ષણ કર્યું હતું. રિવાબા જાડેજાએ કોઈ ઔપચારિકતા રાખવાને બદલે હોસ્ટેલની વિદ્યાર્થીનીઓ સાથે જમીન પર બેસીને આત્મીયતાપૂર્વક વાતચીત કરી હતી.
તેમણે વિદ્યાર્થીનીઓને પૂછ્યું હતું કે: હોસ્ટેલમાં રહેવાની અને જમવાની સુવિધા કેવી છેઅભ્યાસમાં કોઈ મુશ્કેલી પડી રહી છે કે કેમ? ભવિષ્યમાં તેઓ કયા ક્ષેત્રમાં કારકિર્દી બનાવવા માંગે છે? તેમણે હોસ્ટેલના રસોડા, રહેવાના રૂમ અને સ્વચ્છતાની પણ તપાસ કરી હતી. તેમણે સંસ્થાના સંચાલકોને સૂચન કર્યું હતું કે, દીકરીઓને ઘર જેવું વાતાવરણ મળે અને તેમના શિક્ષણમાં કોઈ બાધા ન આવે તેની ખાસ કાળજી રાખવી.”દીકરીઓ જ્યારે ઘરથી દૂર રહીને અભ્યાસ કરતી હોય, ત્યારે તેમને સુરક્ષિત અને પ્રોત્સાહક વાતાવરણ પૂરું પાડવું એ આપણી નૈતિક જવાબદારી છે.” – રિવાબા જાડેજા
રિવાબાએ વિદ્યાર્થીનીઓને પ્રોત્સાહિત કરતા જણાવ્યું હતું કે, આજના સમયમાં દીકરીઓ દરેક ક્ષેત્રમાં આગળ વધી રહી છે. જો મનમાં મક્કમ નિર્ધાર હોય તો કોઈ પણ લક્ષ્ય હાંસલ કરી શકાય છે.
મંત્રીની આ મુલાકાતથી હોસ્ટેલની વિદ્યાર્થીનીઓમાં અનેરો ઉત્સાહ જોવા મળ્યો હતો.આ પ્રસંગે શાળાના ટ્રસ્ટીઓ, શિક્ષકો અને સ્થાનિક આગેવાનો પણ ઉપસ્થિત રહ્યા હતા.
