By 40 પશુઓનો બચાવ, કાંટ પાંજરાપોળ મુકાયા
બનાસકાંઠા જિલ્લામાં પશુઓની ગેરકાયદેસર હેરાફેરી અટકાવવા માટે પોલીસ સતર્ક બની છે. ડીસા દક્ષિણ પોલીસે ગત રાત્રિ દરમિયાન પેટ્રોલિંગમાં વધુ એક સફળતા મેળવતા પશુ ભરેલી આઈસર ગાડી ઝડપી પાડી છે. આ કાર્યવાહીને પગલે પશુઓની હેરાફેરી કરતા અસામાજિક તત્વોમાં ભારે ફફડાટ વ્યાપી ગયો છે.
ડીસા હાઇવે પરથી રાત્રિના સમયે મૂંગા પશુઓને કતલખાને કે અન્યત્ર ગેરકાયદેસર લઈ જતી ગાડીઓ પસાર થતી હોવાની બાતમીના આધારે દક્ષિણ પોલીસ સ્ટેશનના પી.આઈ. અને તેમના સ્ટાફ દ્વારા સઘન નાઈટ પેટ્રોલિંગ હાથ ધરવામાં આવ્યું હતું. આ દરમિયાન શંકાસ્પદ હાલતમાં પસાર થતી એક આઈસર ગાડીને રોકી તપાસ કરતા તેમાંથી ખીચોખીચ ભરેલા પશુઓ મળી આવ્યા હતા.પોલીસે આ ગાડીમાંથી ક્રૂરતાપૂર્વક બાંધેલા અંદાજે 40 જેટલા પાડાઓને મુક્ત કરાવ્યા હતા. આ તમામ પશુઓને તાત્કાલિક સુરક્ષિત સ્થળે ખસેડવા માટે ડીસાની કાંટ પાંજરાપોળ ખાતે મોકલવામાં આવ્યા છે. ડીસા હાઇવે પર પોલીસની વધતી જતી સક્રિયતા અને કડક તપાસને કારણે પશુઓની હેરાફેરી કરતા શખ્સોમાં ડરનો માહોલ જોવા મળી રહ્યો છે. પોલીસે ગાડીના ચાલક અને અન્ય સંડોવાયેલા શખ્સો વિરુદ્ધ પશુ સંરક્ષણ ધારા હેઠળ કાયદેસરની કાર્યવાહી હાથ ધરી છે.
