By રશિયા અને યુક્રેન વચ્ચે યુદ્ધ ચાલુ છે. યુદ્ધ વચ્ચે યુક્રેનિયન રાષ્ટ્રપતિ વોલોડીમીર ઝેલેન્સકી ફ્રાન્સની મુલાકાતે છે. આ દરમિયાન ઝેલેન્સકી અને ફ્રાન્સના રાષ્ટ્રપતિ ઇમેન્યુઅલ મેક્રોન વચ્ચે એક મહત્વપૂર્ણ બેઠક યોજાઈ હતી. આ બેઠક અંગે, ઝેલેન્સકીએ સોશિયલ મીડિયા પ્લેટફોર્મ પર પોસ્ટ કરીને કહ્યું, “અમે યુક્રેન માટે લાંબા ગાળાની સુરક્ષા ગેરંટીઓને પૂર્ણ કરી રહ્યા છીએ અને અમારા યુક્રેનિયન સંરક્ષણ દળોને સમર્થન સુનિશ્ચિત કરી રહ્યા છીએ. હું તેમની ભાગીદારી અને સમર્થન બદલ દરેકનો આભાર માનું છું.
ફ્રાન્સે યુક્રેનને શક્ય તમામ મદદની ખાતરી આપી દીધી છે. યુક્રેનના રાષ્ટ્રપતિ વોલોડીમીર ઝેલેન્સકી અગાઉ પણ ફ્રાન્સની મુલાકાત લઈ ચૂક્યા છે. તાજેતરમાં, ઇમેન્યુઅલ મેક્રોને કહ્યું હતું કે યુક્રેન ફ્રાન્સ પર આધાર રાખી શકે છે. છેલ્લા ઘણા મહિનાઓથી, યુરોપિયન દેશો રશિયા-યુક્રેન યુદ્ધને રોકવા માટે યુએસ રાષ્ટ્રપતિ ડોનાલ્ડ ટ્રમ્પના પ્રયાસો વચ્ચે યુક્રેનને ટેકો આપવાના મુદ્દા પર ચર્ચા કરી રહ્યા છે. ચર્ચાનું કેન્દ્રબિંદુ એ છે કે જો યુદ્ધ બંધ થયા પછી રશિયા ફરીથી હુમલો કરે તો તેની સાથે લશ્કરી રીતે કેવી રીતે વ્યવહાર કરવો. ફ્રાન્સના રાષ્ટ્રપતિ ઇમેન્યુઅલ મેક્રોન અને બ્રિટિશ વડા પ્રધાન કીર સ્ટાર્મરે ભાર મૂક્યો હતો કે યુક્રેનને આપવામાં આવેલી કોઈપણ લશ્કરી સુરક્ષા ગેરંટીમાં યુએસની ભાગીદારી આવશ્યક છે.
દરમિયાન, અમે તમને અહીં એ પણ જણાવી દઈએ કે, તાજેતરમાં ઝેલેન્સકીએ એક મોટું નિવેદન આપ્યું હતું જેમાં કહેવામાં આવ્યું હતું કે રશિયા યુદ્ધવિરામ માટે ‘વધુ તૈયાર’ લાગે છે. તેમણે કહ્યું હતું કે યુક્રેન અને અમેરિકાએ સંભવિત કરાર અંગે મોસ્કો દ્વારા ગેરમાર્ગે દોરવું જોઈએ નહીં. ઝેલેન્સકીએ કહ્યું હતું કે, “યુક્રેન ચોક્કસપણે તેની સ્વતંત્રતાનું રક્ષણ કરશે. આપણે બધાને કાયમી અને વિશ્વસનીય શાંતિની જરૂર છે. રશિયાએ પોતે શરૂ કરેલા યુદ્ધનો અંત લાવવો જોઈએ.”
