રેલ્વે અકસ્માત અંગે ક્યારે જાગશે સરકાર? રાહુલ ગાંધીએ જવાબદારીને લઈને કહી આ વાત

કોંગ્રેસના પૂર્વ અધ્યક્ષ અને લોકસભામાં વિપક્ષના નેતા રાહુલ ગાંધીએ શનિવારે તમિલનાડુમાં ટ્રેન દુર્ઘટનાને લઈને સરકાર પર નિશાન સાધ્યું. તેમણે કહ્યું કે જવાબદારી ટોચના સ્તરથી શરૂ થાય છે. અનેક અકસ્માતો થયા છતાં કોઈ બોધપાઠ ન શીખ્યો. તેમણે એવો સવાલ પણ કર્યો કે કેટલા પરિવારો બરબાદ થયા પછી આ સરકાર જાગશે?

રાહુલ ગાંધીએ ‘X’ પર પોસ્ટ કર્યું, “મૈસુર-દરભંગા ટ્રેન અકસ્માત ભયાનક બાલાસોર અકસ્માતને પ્રતિબિંબિત કરે છે. એક પેસેન્જર ટ્રેન ગુડ્સ ટ્રેન સાથે અથડાઈ. અનેક અકસ્માતોમાં અનેક લોકોએ જીવ ગુમાવ્યા હોવા છતાં કોઈ પાઠ ભણવામાં આવતો નથી. જવાબદારી ઉપરથી શરૂ થાય છે.” તેમણે પૂછ્યું કે કેટલા પરિવારો બરબાદ થયા પછી આ સરકાર જાગશે?

ટ્રેન નંબર 12578 મૈસુર-દરભંગા એક્સપ્રેસ તમિલનાડુના પોનેરી-કાવરાપેટ્ટાઈ રેલવે સ્ટેશનો વચ્ચે ચેન્નાઈ-ગુદુર રેલવે સેક્શન પર પાછળથી આવતી માલગાડી સાથે અથડાઈ હતી. આ અકસ્માતમાં 19 લોકો ઘાયલ થયા છે. મળતી માહિતી મુજબ જ્યારે આ ટ્રેન દુર્ઘટનાગ્રસ્ત થઈ ત્યારે તેની સ્પીડ લગભગ 75 કિમી પ્રતિ કલાક હતી. જે મુખ્ય કારણ સામે આવ્યું છે તે મુજબ આ ટ્રેન મેઈન લાઈનમાં જવાને બદલે લૂપ લાઈનમાં ગઈ હતી.

અકસ્માત બાદ ટ્રેનના એક ડબ્બામાં પણ આગ લાગી હતી. અકસ્માતના સમાચાર મળતાની સાથે જ ઘટનાસ્થળે રાહત અને બચાવ કાર્ય શરૂ કરી દેવામાં આવ્યું હતું. દિલ્હીમાં રેલ્વે મંત્રી અશ્વિની વૈષ્ણવે પોતે વોર રૂમમાં પહોંચીને રાહત અને બચાવ કાર્ય પર નજર રાખવાનું શરૂ કર્યું હતું. બીજી તરફ તમિલનાડુના મુખ્યમંત્રી એમકે સ્ટાલિને આ ઘટના પર દુખ વ્યક્ત કર્યું છે.