ચિત્રાસણી હાઈવે પર દૂધના ટેન્કર અને ટ્રક વચ્ચે અકસ્માત: ગંભીર ઘાયલ ટેન્કર ચાલકને સારવાર અર્થે ખસેડાયો

પાલનપુર-આબુ હાઇવે સ્થિત ચિત્રાસણી પાસે દૂધના ટેન્કરને અકસ્માત નડ્યો હતો. ટેન્કર અને ટ્રક વચ્ચે સર્જાયેલા અકસ્માતમાં ટેન્કર ચાલકને ગંભીર ઈજાઓ થતા L&T વિભાગ દ્વારા ચાલકને નજીકની હોસ્પિટલ ખાતે ખસેડવામાં આવ્યો હતો.

પાલનપુર તાલુકાના ચિત્રાસણી નજીક નેશનલ હાઈવે પર રાજસ્થાન તરફથી આવી રહેલ દુધના ટેન્કરને અકસ્માત નડ્યો હતો. રાજસ્થાનના જયપુર તરફથી ખાલી દૂધનું ટેન્કર પાલનપુર તરફ આવી રહ્યું હતું. ત્યારે ચિત્રાસણી નજીક આગળ જઈ રહેલા ટ્રક સાથે અકસ્માત સર્જાતા ટેન્કર ચાલક ગંભીર રીતે ઘાયલ થયો હતો. બનાવના પગલે એલ એન્ડ ટી વિભાગ તાત્કાલિક ઘટના સ્થળે પહોંચી ઈજાગ્રસ્ત ટેન્કર ચાલક કેબીન માંથી બહાર કાઢી સારવાર માટે પાલનપુર હોસ્પિટલ ખાતે ખસેડવામાં આવ્યો હતો. બનાવની જાણ પોલીસને થતા પાલનપુર તાલુકા પોલીસ ઘટના સ્થળ પર દોડી આવી આગળની તપાસ હાથ ધરી છે. જોકે અકસ્માતના કારણે ટેન્કરના આગળના ભાગના કેબિનના ફૂરચા ઉડી ગયા હતા.