![](https://www.rakhewaldaily.com/wp-content/uploads/2024/08/shiv.png)
દિવાલ પડવાથી 9 બાળકોના મોત બાદ અધિકારીઓએ લીધી કાર્યવાહી, ડીએમ-એસડીએમને હટાવ્યા
મધ્યપ્રદેશના સાગર જિલ્લામાં દિવાલ ધરાશાયી થવાથી નવ બાળકોના મોત બાદ મુખ્યમંત્રી મોહન યાદવે મોટી કાર્યવાહી કરી છે. તેમણે રવિવારે રાત્રે સાગર જિલ્લા મેજિસ્ટ્રેટ, પોલીસ અધિક્ષક અને સંબંધિત સબ-ડિવિઝનલ ઑફિસર (SDM) ને હટાવવાનો આદેશ આપ્યો. એક અધિકારીએ જણાવ્યું કે ટ્રાન્સફરના ઓર્ડર મોડી રાત્રે જારી કરવામાં આવ્યા હતા. આદેશ અનુસાર, સાગર જિલ્લા મેજિસ્ટ્રેટ દીપક આર્યને નાયબ સચિવના પદ પર ભોપાલમાં રાજ્ય સચિવાલયમાં ટ્રાન્સફર કરવામાં આવ્યા છે.
અધિકારીએ જણાવ્યું કે આર્યના સ્થાને છતરપુર જિલ્લા મેજિસ્ટ્રેટ સંદીપ જીઆરને સાગરના નવા જિલ્લા મેજિસ્ટ્રેટ તરીકે નિયુક્ત કરવામાં આવ્યા છે. તેમણે માહિતી આપી હતી કે પાર્થ જયસ્વાલ, જે હાલમાં છિંદવાડા જિલ્લા પંચાયતના CEO તરીકે નિયુક્ત છે, તેઓ છત્તરપુરમાં સંદીપ જીઆરનું સ્થાન લેશે. સરકારે સાગરના પોલીસ અધિક્ષક અભિષેક તિવારીની પણ બદલી કરી છે અને તેમને ભોપાલમાં પોલીસ હેડક્વાર્ટરમાં આસિસ્ટન્ટ ઈન્સ્પેક્ટર જનરલ (AIG) તરીકે નિયુક્ત કર્યા છે.
હરિઓમ બંસલ બેદરકારીના આરોપમાં સસ્પેન્ડ
અધિકારીએ કહ્યું કે વિકાસ કુમાર સેહવાલ, જે હાલમાં રાયસેનના પોલીસ અધિક્ષક તરીકે છે, હવે સાગરના નવા પોલીસ અધિક્ષક હશે. મુખ્યમંત્રીએ સાગરના સબ-ડિવિઝનલ મેજિસ્ટ્રેટની બદલીનો આદેશ પણ આપ્યો હતો. યાદવે શાહપુર પ્રાથમિક આરોગ્ય કેન્દ્રમાં તૈનાત ડૉ. હરિઓમ બંસલને પણ બેદરકારીના આરોપસર તાત્કાલિક અસરથી સસ્પેન્ડ કરવાનો આદેશ આપ્યો હતો.