CM ભૂપેન્દ્ર પટેલે મનુ ભાકરને ઓલિમ્પિક મેડલ જીતવા બદલ અભિનંદન પાઠવ્યા

ભારતને પેરિસ ઓલિમ્પિકમાં પ્રથમ મેડલ મળ્યો છે. ભારતીય શૂટર મનુ ભાકરે 10 મીટર એર પિસ્તોલ સ્પર્ધામાં બ્રોન્ઝ મેડલ સાથે ભારતનું ખાતું ખોલાવ્યું છે. પેરિસ ઓલિમ્પિકમાં ભારતનો આ પહેલો મેડલ છે, જેના કારણે દેશમાં ખુશીનો માહોલ છે. 22 વર્ષની શૂટર મનુ ભાકરને ચારે બાજુથી અભિનંદન મળી રહ્યા છે. દરમિયાન ગુજરાતના મુખ્યમંત્રી ભૂપેન્દ્ર પટેલે પણ ભારતીય શૂટર મનુ ભાકરને ઓલિમ્પિક મેડલ જીતવા બદલ અભિનંદન પાઠવ્યા છે.

CM પટેલે અભિનંદન પાઠવ્યા

ગુજરાતના સીએમ ભૂપેન્દ્ર પટેલે મનુ ભાકરને તેમના સત્તાવાર એક્સ હેન્ડલ પર ઓલિમ્પિક મેડલ સાથેનો ફોટો શેર કરીને અભિનંદન પાઠવ્યા છે. સીએમ પટેલે પોસ્ટમાં લખ્યું છે કે પેરિસ ઓલિમ્પિકમાં 10 મીટર એર પિસ્તોલ ઈવેન્ટમાં બ્રોન્ઝ મેડલ જીતીને ભારતને પ્રથમ મેડલ અપાવનાર મનુ ભાકરને ખૂબ ખૂબ અભિનંદન અને શુભેચ્છાઓ. સીએમ ભૂપેન્દ્ર પટેલે વધુમાં લખ્યું કે આ સાથે મનુ ભાકર શૂટિંગમાં ઓલિમ્પિક મેડલ જીતનારી ભારતની પ્રથમ મહિલા ખેલાડી બની છે. સીએમ પટેલે આગળ લખ્યું કે મનુ ભાકર, તારી આ સિદ્ધિ ભારતની મહિલા શક્તિની તાકાતનું પ્રતિક છે. આ સિદ્ધિ તમામ દેશવાસીઓ માટે આનંદ અને ગર્વની ક્ષણ લઈને આવી છે.