Video/ વિદેશમાં ભારતીય યુવકને મળી સુકા રણમાં ઊંટોની દેખરેખ રાખવાની નોકરી, વિડિયો શેર કરી બતાવી આપવીતી

viral video: ઘણા લોકો સારા પૈસા કમાવવા માટે વિદેશ જવા માંગે છે. પરંતુ આ સમય દરમિયાન તેઓ ખરાબ એજન્ટોની જાળમાં ફસાઈ જાય છે. તાજેતરમાં જ આવો જ એક કિસ્સો પ્રકાશમાં આવ્યો છે, જે લોકોનું ધ્યાન ખેંચી રહ્યું છે. આંધ્રપ્રદેશના આંબેડકર કોનાસીમા જિલ્લામાં રહેતા એક યુવકનો વીડિયો સોશિયલ મીડિયા પર વાયરલ થઈ રહ્યો છે. વીરેન્દ્ર નામના વ્યક્તિએ ભારત સરકારને સાઉદી અરેબિયાથી તેને પરત લાવવાની અપીલ કરી છે.

જિલ્લાના ઇસુકા પુડી ગામના વીરેન્દ્ર કુમારની ઉંમર 23 વર્ષ છે. વીરેન્દ્ર 10 જુલાઈ 2024ના રોજ તેલંગાણાની રાજધાની હૈદરાબાદથી એક એજન્ટ મારફતે કતાર ગયો હતો. જો કે, બાદમાં તેને સાઉદી અરેબિયા લઈ જવામાં આવ્યો અને તેને રણમાં ઊંટો ચરાવવાનું કામ સોંપવામાં આવ્યું.

સાઉદી અરેબિયામાં આંધ્રપ્રદેશનો યુવક

મળતી માહિતી મુજબ, એક એજન્ટે વીરેન્દ્રને ઘરે રસોઈ બનાવવાનું કામ આપવાનું કહ્યું હતું, પરંતુ તેને રણમાં ઊંટોની રક્ષા માટે મૂકવામાં આવ્યો હતો. એજન્ટે તેની સાથે એક લાખ સિત્તેર હજાર રૂપિયા લઈને છેતરપિંડી કરી અને બાદમાં તેને રણમાં છોડી દીધો. વાયરલ વીડિયોમાં વીરેન્દ્ર ભારત સરકાર પાસે મદદની વિનંતી કરતા જોવા મળે છે. સેલ્ફી વિડિયોમાં તે લાચાર અને થાકેલા દેખાય છે.