![](https://www.rakhewaldaily.com/wp-content/uploads/2024/06/kuwait.png)
કુવૈતમાં લાગી ભીષણ આગ, 40 ભારતીયોના મોત, PM મોદીએ બોલાવી ઈમરજન્સી બેઠક
દક્ષિણ કુવૈતના મંગાફ વિસ્તારમાં વિદેશી કામદારોના રહેઠાણની બહુમાળી ઇમારતમાં ભારે આગને કારણે નોંધપાત્ર નુકસાન થયું છે. આગમાં લગભગ 40 ભારતીયોના મોત થયા હતા જ્યારે 50થી વધુ લોકો ઘાયલ થયા હતા. આ મામલાને લઈને એક અધિકારી દ્વારા માહિતી આપવામાં આવી હતી કે અલ-મંગફ નામની આ ઈમારતમાં ભીષણ આગને કારણે કુલ 49 લોકોના મોત થયા છે. તેમાંથી 40થી વધુ ભારતીય હોવાની શંકા છે જ્યારે અન્ય પાકિસ્તાન, ફિલિપાઈન્સ, ઈજિપ્ત અને નેપાળના નાગરિકો હતા.
મોડી રાત્રે વિદેશ મંત્રાલય દ્વારા એક નિવેદન બહાર પાડવામાં આવ્યું છે. તેમાં કહેવામાં આવ્યું છે કે કુવૈતના મંગાફ વિસ્તારમાં એક રહેણાંક મકાનમાં આગ લાગવાની દુર્ભાગ્યપૂર્ણ અને દુ:ખદ ઘટનામાં લગભગ 40 ભારતીયોએ જીવ ગુમાવ્યા છે. આ બિલ્ડિંગમાં મજૂરો રહેતા હતા. pm મોદીએ આ ઘટનાને ‘દુઃખદ’ ગણાવી અને વિદેશ મંત્રી એસ જયશંકર, રાષ્ટ્રીય સુરક્ષા સલાહકાર અજીત ડોભાલ, વિદેશ સચિવ વિનય ક્વાત્રા, વડાપ્રધાનના મુખ્ય સચિવ પીકે મિશ્રા અને અન્ય વરિષ્ઠ અધિકારીઓ સાથે બેઠક કરી. બેઠકમાં સ્થિતિની સમીક્ષા કરવામાં આવી હતી. પીએમ મોદીએ મૃત ભારતીય નાગરિકોના પરિવારજનો માટે પ્રધાનમંત્રી રાહત ફંડમાંથી પ્રત્યેકને 2 લાખ રૂપિયાની એક્સ-ગ્રેશિયા રકમની જાહેરાત કરી છે.
શું કહ્યું વિદેશ મંત્રી એસ જયશંકરે
અહીં વિદેશ મંત્રી એસ જયશંકરે તેમના કુવૈતી સમકક્ષ અબ્દુલ્લા અલી અલ-યાહ્યા સાથે ફોન પર વાત કરી હતી. વાતચીત દરમિયાન, વિદેશ મંત્રીએ તેમને વિનંતી કરી કે આગને કારણે જીવ ગુમાવનારા ભારતીયોના મૃતદેહોને તાત્કાલિક ભારત મોકલવામાં આવે. આ અંગે જયશંકરે સોશિયલ મીડિયા પ્લેટફોર્મ ‘X’ પર લખ્યું કે કુવૈતમાં આગની ઘટના પર કુવૈતના વિદેશ મંત્રી અબ્દુલ્લા અલી અલ-યાહ્યા સાથે મારી વાતચીત થઈ. વાતચીત દરમિયાન ખાતરી આપવામાં આવી હતી કે આ ઘટનાની સંપૂર્ણ તપાસ કરવામાં આવશે અને જવાબદારી નક્કી કરવામાં આવશે.
ઘાયલોની સારવાર ચાલુ છે
એક નિવેદનમાં, વિદેશ મંત્રાલયે કહ્યું છે કે કુવૈતમાં ભારતીય દૂતાવાસ કુવૈતી અધિકારીઓ પાસેથી સંપૂર્ણ વિગતો એકત્ર કરવામાં વ્યસ્ત છે. કુવૈતમાં ઘાયલ થયેલા લોકોને પાંચ સરકારી હોસ્પિટલો (એદન, જાબેર, ફરવાનીયા, મુબારક અલ કબીર અને જાહરા)માં દાખલ કરવામાં આવ્યા છે જ્યાં તેમની સારવાર કરવામાં આવી રહી છે. હોસ્પિટલ પ્રશાસનના જણાવ્યા અનુસાર દાખલ કરાયેલા મોટાભાગના દર્દીઓની તબિયત સ્થિર છે.
મૃતકોમાં કેરળ, તમિલનાડુ અને ઉત્તર ભારતીય રાજ્યોના લોકોનો સમાવેશ
અંગ્રેજી દૈનિક અરબ ટાઈમ્સ અનુસાર, મોટાભાગના મૃતકોમાં કેરળ, તમિલનાડુ અને ઉત્તર ભારતીય રાજ્યોના ભારતીય નાગરિકોનો સમાવેશ થાય છે, જેમની ઉંમર 20 થી 50 વર્ષની વચ્ચે હતી. સંબંધિત ઇમારત NBTC ગ્રુપ દ્વારા ભાડે લેવામાં આવી હતી. કુવૈતમાં ભારતીય દૂતાવાસે સોશિયલ મીડિયા પર લખ્યું છે કે ભારતીય કામદારોને ઘેરી લેનાર દુ:ખદ આગ અકસ્માતના સંદર્ભમાં, એમ્બેસીએ ઇમરજન્સી હેલ્પલાઇન નંબર (+965-65505246) જારી કર્યો છે. તમને જણાવી દઈએ કે કુવૈતની કુલ વસ્તી (10 લાખ)ના 21 ટકા અને તેના શ્રમ દળના 30 ટકા (લગભગ નવ લાખ) ભારતીયો છે.