સોનાની દાણચોરીમાં એર હોસ્ટેસની ધરપકડ, પ્રાઈવેટ પાર્ટમાં સોનું લઈ જવાનો આરોપ

આરોપી એર હોસ્ટેસની ઓળખ 26 વર્ષની સુરભી ખાતૂન તરીકે થઈ છે. તે મૂળ કોલકાતાની છે. સુરભી કથિત રીતે તેના પ્રાઈવેટ પાર્ટમાં લગભગ 960 ગ્રામ સોનું છુપાવીને ઓમાનનાં મસ્કતથી સ્મ્ગલ કરવાનાં પ્રયત્નો કરી રહી હતી.  28 મેના રોજ મસ્કતથી એર ઈન્ડિયાની ફ્લાઈટ કન્નુર પહોંચી હતી. સુરભી તે ફ્લાઈટના કેબિન ક્રૂનો ભાગ હતી.

કન્નુર એરપોર્ટ પર ડીઆરઆઈના અધિકારીઓએ સોનું જપ્ત કર્યું હોવાના અહેવાલ છે. સમાચાર એજન્સી પીટીઆઈએ સૂત્રોને ટાંકીને જણાવ્યું હતું કે પૂછપરછ અને જરૂરી ઔપચારિકતાઓ પૂર્ણ કર્યા પછી, આરોપીને મેજિસ્ટ્રેટ સમક્ષ રજૂ કરવામાં આવ્યો હતો અને તેને 14 દિવસની કસ્ટડી માટે કન્નુર મહિલા જેલમાં મોકલવામાં આવી હતી. સૂત્રએ દાવો કર્યો છે કે ભારતમાં આ પહેલો કિસ્સો છે જ્યાં એરલાઇનના ક્રૂ મેમ્બરને તેના પ્રાઈવેટ પાર્ટમાં સોનું છુપાવીને દાણચોરી કરવાના આરોપમાં પકડવામાં આવ્યો છે.

મીડિયા રિપોર્ટ્સ અનુસાર, અત્યાર સુધી મળેલા પુરાવાઓ પરથી જાણવા મળ્યું છે કે સુરભીએ ભૂતકાળમાં ઘણી વખત સોનાની દાણચોરી કરી છે. રિપોર્ટ અનુસાર દાણચોરી ગેંગમાં કેરળના કેટલાક વધુ લોકોની સંડોવણીની પણ તપાસ કરવામાં આવી રહી છે.