![](https://www.rakhewaldaily.com/wp-content/uploads/2024/03/jghad.png)
સરકાર માટે રાહતના સમાચાર, બેરોજગારી 3 વર્ષમાં સૌથી નીચા સ્તરે
આંકડા મંત્રાલયના નેશનલ સેમ્પલ સર્વે ઓર્ગેનાઈઝેશને જણાવ્યું છે કે વર્ષ 2023માં 15 વર્ષ અને તેથી વધુ વયના લોકો માટે બેરોજગારીનો દર ઘટીને 3.1 ટકા થઈ ગયો હતો, જે ત્રણ વર્ષમાં સૌથી નીચો સ્તર છે. નેશનલ સેમ્પલ સર્વે ઓર્ગેનાઈઝેશન (NSSO) દ્વારા મંગળવારે જાહેર કરાયેલ સામયિક લેબર ફોર્સ સર્વે રિપોર્ટ અનુસાર, દેશનો બેરોજગારી દર કેલેન્ડર વર્ષ 2023માં 3.1 ટકા હતો, જ્યારે 2022માં તે 3.6 ટકા અને 2021માં 4.2 ટકા હતો. બેરોજગારી દર શ્રમ દળ (15 વર્ષથી વધુ વય જૂથ) માં બેરોજગાર લોકોની ટકાવારી તરીકે વ્યાખ્યાયિત કરવામાં આવે છે.
સ્ત્રી અને પુરુષ બેરોજગારી
માહિતી અનુસાર, માર્ચ 2020 માં દેશમાં કોવિડ રોગચાળો ફેલાયો ત્યારથી રોજગારની સ્થિતિમાં સુધારો થઈ રહ્યો છે. રોગચાળાને કાબૂમાં લેવા માટે લાદવામાં આવેલા લોકડાઉનને કારણે આર્થિક ગતિવિધિઓ સંપૂર્ણપણે ઠપ થઈ ગઈ હતી. પરંતુ કેન્દ્ર અને રાજ્યોમાં લોકડાઉન હટાવ્યા બાદ આર્થિક ગતિવિધિઓમાં વધારો થવાને કારણે સ્થિતિમાં સુધારો થયો છે. સર્વેમાં સામે આવ્યું છે કે મહિલાઓમાં બેરોજગારીનો દર પણ 2023માં ત્રણ ટકા પર આવી ગયો છે. 2022માં મહિલા બેરોજગારી 3.3 ટકા અને 2021માં 3.4 ટકા હતી. એ જ રીતે, પુરુષો માટે બેરોજગારીનો આંકડો 2022માં 3.7 ટકા અને 2021માં 4.5 ટકા હતો, પરંતુ ગયા વર્ષે તે ઘટીને 3.2 ટકા થયો હતો.
શહેરી અને ગ્રામીણ બેરોજગારી
વર્ષ 2023માં શહેરી વિસ્તારોમાં કુલ બેરોજગારીનો દર પણ ઘટીને 5.2 ટકા પર આવી ગયો. વર્ષ 2022માં શહેરી બેરોજગારીનો દર 5.7 ટકા હતો જ્યારે વર્ષ 2021માં તે 6.5 ટકા હતો. એ જ રીતે, ગ્રામીણ વિસ્તારોમાં બેરોજગારીનો દર 2022માં 2.8 ટકા અને 2021માં 3.3 ટકાથી ઘટીને ગયા વર્ષે 2.4 ટકા થયો હતો. શહેરી વિસ્તારોમાં 15 વર્ષ અને તેથી વધુ વયના લોકોની વર્તમાન સાપ્તાહિક સ્થિતિ (CWS) માં શ્રમ દળ સહભાગિતા દર (LFPR) 2022 માં 52.8 ટકા અને 2021 માં 51.8 ટકાથી વધીને 2023 માં 56.2 ટકા થયો.
Tags india Rakhewal unemployment