વિરાટ કોહલીએ ભારત-ઈંગ્લેન્ડ ટેસ્ટ શ્રેણીમાંથી નામ પાછું ખેંચ્યું? રિપોર્ટમાં કરાયો મોટો દાવો

ભારત અને ઈંગ્લેન્ડ વચ્ચેની ટેસ્ટ સીરીઝની વચ્ચે ચાહકો માટે એક ખરાબ સમાચાર આવી રહ્યા છે. અહેવાલોમાં દાવો કરવામાં આવ્યો છે કે ભારતના ભૂતપૂર્વ કેપ્ટન વિરાટ કોહલીએ ભારતીય ક્રિકેટ કંટ્રોલ બોર્ડ (BCCI) અને પસંદગી સમિતિને જાણ કરી છે કે તે ઈંગ્લેન્ડ સામેની પાંચ મેચોની શ્રેણીની બાકીની ત્રણ ટેસ્ટ મેચમાંથી ખસી રહ્યો છે. એવો દાવો કરવામાં આવ્યો છે કે વિરાટ કોહલીએ શુક્રવારે આ અંગે બીસીસીઆઈને જાણ કરી હતી. તમને જણાવી દઈએ કે ભારત અને ઈંગ્લેન્ડ વચ્ચે ત્રીજી ટેસ્ટ મેચ 15 ફેબ્રુઆરીથી રાજકોટમાં રમાશે.

વિરાટ કોહલીએ ટેસ્ટ શ્રેણીમાંથી પોતાનું નામ પાછું ખેંચ્યું?

ઈન્ડિયન એક્સપ્રેસના અહેવાલ મુજબ, શુક્રવારે પસંદગીકારોની એક ઓનલાઈન મીટિંગ થઈ હતી, જેમાં વિરાટ કોહલીએ માહિતી આપી હતી કે તે ઈંગ્લેન્ડ સામેની બાકીની ત્રણ ટેસ્ટ મેચ માટે ભારતીય ટેસ્ટ ટીમનો ભાગ બની શકશે નહીં. ઇંગ્લેન્ડ સામેની છેલ્લી ત્રણ ટેસ્ટ મેચ માટે પસંદગી સમિતિ આજે ભારતીય ટીમની જાહેરાત કરી શકે છે. પાંચ મેચોની ટેસ્ટ શ્રેણી હાલમાં 1-1થી બરાબર છે. ત્રીજી ટેસ્ટ માટે પસંદ કરાયેલા ભારતીય ખેલાડીઓને 11 ફેબ્રુઆરીએ રાજકોટમાં રિપોર્ટ કરવા માટે કહેવામાં આવ્યું છે.

કોહલી પ્રથમ વખત ભારતમાં આખી ટેસ્ટ સિરીઝ ગુમાવશે

વિરાટ કોહલીના કરિયરમાં આ પહેલીવાર હશે જ્યારે તે કોઈ ઘરેલુ ટેસ્ટ સિરીઝનો ભાગ નહીં હોય. વિરાટ કોહલી અંગત કારણોસર શ્રેણીની પ્રથમ બે ટેસ્ટ મેચ રમી શક્યો ન હતો અને જાણવા મળે છે કે તે પોતાના પરિવાર સાથે ઈંગ્લેન્ડ ગયો હતો. શ્રેણીની શરૂઆતના ત્રણ દિવસ પહેલા વિરાટ કોહલીએ ભારતીય ટીમ મેનેજમેન્ટ અને પસંદગીકારોને કહ્યું હતું કે તે બ્રેક ઈચ્છે છે. ત્યારે બીસીસીઆઈએ તેની પ્રેસ રિલીઝમાં કહ્યું હતું કે દેશનું પ્રતિનિધિત્વ કરવું એ હંમેશા વિરાટ કોહલીની સર્વોચ્ચ પ્રાથમિકતા રહી છે, પરંતુ કેટલાક અંગત સંજોગો તેના પરિવાર સાથે તેની હાજરીની માંગ કરે છે. BCCI તેના નિર્ણયનું સન્માન કરે છે અને બોર્ડ અને ટીમ મેનેજમેન્ટે આ સ્ટાર બેટ્સમેનને સમર્થન આપ્યું છે.

જસપ્રીત બુમરાહ ત્રીજી ટેસ્ટ રમશે

પસંદગીકારોએ ફાસ્ટ બોલર જસપ્રિત બુમરાહના વર્કલોડ મેનેજમેન્ટ અંગેની ચર્ચાને પણ ઉકેલી લીધી છે. જસપ્રીત બુમરાહ રાજકોટમાં ઈંગ્લેન્ડ સામે મહત્વની ટેસ્ટ મેચ રમશે. પસંદગી સમિતિએ ઈંગ્લેન્ડ સામેની બાકીની ત્રણ ટેસ્ટ મેચો માટે ઝડપી બોલર આકાશ દીપની પસંદગી કરવાનો નિર્ણય લીધો છે. પરિણામે અવેશ ખાનને બહાર ફેંકવામાં આવ્યો છે. પસંદગી સમિતિને લાગ્યું કે અવેશ ખાન માટે ટેસ્ટ ટીમ સાથે બેન્ચ ગરમ કરવાને બદલે રણજી ટ્રોફી રમવું વધુ સારું રહેશે. તેમજ આકાશ દીપને ભારતીય ટીમ સાથે રમવાની તક મળશે. આકાશ દીપે થોડા દિવસો પહેલા ઈંગ્લેન્ડ લાયન્સ સામે જે રીતે બોલિંગ કરી હતી તેનાથી પસંદગી સમિતિ અને ભારતીય કેપ્ટન રોહિત પ્રભાવિત થયા હતા.