તેલંગાણાના ભાજપના ધારાસભ્યોએ શપથ ન લીધા, અકબરુદ્દીન ઓવૈસીને પ્રોટેમ સ્પીકર બનાવવાને લઈને હંગામો

AIMIM ધારાસભ્ય અને અસદુદ્દીન ઓવૈસીના ભાઈ અકબરુદ્દીન ઓવૈસીને તેલંગાણાના પ્રોટેમ સ્પીકર તરીકે નિયુક્ત કરવાનો ભાજપ વિરોધ કરી રહી છે. દરમિયાન, પાર્ટીના તમામ ધારાસભ્યોએ શનિવારે શપથ લેવાનો ઇનકાર કરી દીધો હતો. તેલંગાણા બીજેપી ચીફ જી કિશન રેડ્ડીએ કહ્યું છે કે અમે માંગ કરીએ છીએ કે વિધાનસભા સ્પીકરની ચૂંટણી આ પ્રોટેમ સ્પીકર સાથે ન થવી જોઈએ. અમે આ જ વાત રાજ્યના રાજ્યપાલને પણ જણાવીશું.

હૈદરાબાદમાં એક પત્રકાર પરિષદને સંબોધતા જી કિશન રેડ્ડીએ કહ્યું, ‘અમે 8 બેઠકો જીતી છે અને રાજ્યમાં 14% વોટ ટકાવારી સુધી પહોંચી ગયા છીએ… પ્રોટેમ સ્પીકર તરીકે વરિષ્ઠ નેતાની નિમણૂક કરવાની પરંપરા છે. જો કે AIMIM સાથેની સમજૂતીને કારણે કોંગ્રેસે અકબરુદ્દીન ઓવૈસીને આ પદ પર નિયુક્ત કર્યા છે. અમને આની સામે વાંધો છે. અમારી માંગ છે કે આ પ્રોટેમ સ્પીકર સાથે વિધાનસભા અધ્યક્ષની ચૂંટણી ન થવી જોઈએ. અમે આ જ વાત રાજ્યના રાજ્યપાલને પણ જણાવીશું.” તે જ સમયે ધારાસભ્ય ટી રાજા સિંહે સ્પષ્ટ કહ્યું છે કે અમે અકબરુદ્દીન ઓવૈસીની સામે શપથ નહીં લઈએ. ત્યારે, બીજેપી સાંસદ હરનાથ સિંહ યાદવે કહ્યું કે, ઓવૈસી જેવા લોકોનો ડીએનએ ભારતનો નથી. તેનો ડીએનએ પાકિસ્તાનનો છે. હું ટી રાજા સિંહ અને ભાજપના ધારાસભ્યોના આ નિર્ણયનું સ્વાગત કરું છું. ભાજપનો આ એકદમ યોગ્ય નિર્ણય છે.

તેમણે કહ્યું કે, આવી વ્યક્તિ જે જાહેર સભામાં હિંદુઓને ધમકી આપે છે અને અપશબ્દો બોલે છે… આવા દેશદ્રોહી વ્યક્તિને પ્રોટેમ સ્પીકર બનાવીને કોંગ્રેસની ગંદી અને ઘૃણાસ્પદ માનસિકતા સામે આવી છે. આ નિર્ણય કોંગ્રેસના પતનનું શિખર છે.