ડીસામાં આરોગ્ય વિભાગ અને પાલિકાએ અખાદ્ય ચીજવસ્તુઓ વેચતા વેપારીઓને દંડ ફટકાર્યો

બનાસકાંઠાના ડીસામાં આજે ફરી અખાદ્ય ચીજવસ્તુઓનું વેચાણ કરતા વેપારીઓને ત્યાં, આરોગ્ય વિભાગ અને નગરપાલિકાની સંયુક્ત ટીમો દ્વારા તપાસ હાથ ધરી હતી. અને અખાદ્ય ચીજવસ્તુઓ મળી આવતા 300થી વધુ દુકાનદારો અને વેપારીઓ પાસેથી દંડ અને નોટીસ ફટકારી વધુ કાર્યવાહી હાથ ધરી હતી.ચોમાસાની ઋતુને ધ્યાને લઈ શહેરમાં રોગચાળો ન ફેલાય તે હેતુથી તેમજ અખાદ્ય ઠંડા પીણા સહિતની ચીજવસ્તુઓના વેચાણના કારણે લોકો બીમારીમાં ન સપડાય તેની તકેદારીના ભાગરૂપે ડીસા નગરપાલિકા અને આરોગ્ય વિભાગની ટીમે સંયુક્ત રીતે અલગ અલગ 11 વોર્ડમાં 11 ટીમો બનાવી અખાદ્ય ચીજવસ્તુઓ વેચતા સ્થળો પર તપાસ શરૂ કરી હતી.આ ટીમોએ શહેરમાં હોટલો, રેસ્ટોરન્ટ, ઠંડાપીણા, ફરસાણ, નાસ્તાની લારીઓ, મીઠાઈની દુકાનો, પાર્લર સહિત તમામ જગ્યાએ તપાસ કરી હતી. જેમાં કેટલીક જગ્યાએ ડેરીમાં વેચાતા દૂધમાં જીવજંતુઓ, ફરસાણની દુકાનમાં બહુ દિવસથી પડેલી ખાદ્ય વસ્તુઓ, વારંવાર ફરસાણ તળતા બળેલું તેલ, તેમજ એક્સપાયરી ડેટવાળી ચીજવસ્તુઓનું વેચાણ કરતા હોવાનું સામે આવ્યું હતું.

આજરોજ આરોગ્ય વિભાગની તપાસ દરમિયાન મોટાભાગની દુકાનોમાં લાઇસન્સ પણ જોવા મળ્યા ન હતા. જેથી અખાદ્ય ચીજવસ્તુઓનું વેચાણ કરતા વેપારીઓને તંત્રની ટીમોએ રૂપિયા 500 થી 5000 રૂપિયા સુધીનો દંડ ફટકાર્યો હતો. તેમજ લોકોના આરોગ્ય સાથે ચેડા કરતા વેપારીઓને નોટિસ ફટકારી કડક કાર્યવાહી હાથ ધરી હતી.ડીસા તાલુકા હેલ્થ ઓફિસર પી.એમ. ચૌધરી એ જણાવ્યું હતું કે, ડીસામાં આજે વહેલી સવારથી તંત્રની ટીમોએ અંદાજિત 300 જેટલા સ્થળો પર તપાસ હાથ ધરી હતી અને અખાર્ધ ચીજ વસ્તુઓનો જથ્થો ઝડપી પાડ્યો હતો અને આવા વેપારીઓ ફરીવાર આવી ચીજ વસ્તુઓ ન વેચે તે માટેની કાર્યવાહી હાથ ધરી હતી.