![](https://www.rakhewaldaily.com/wp-content/uploads/2023/07/01-111.jpg)
ડીસામાં ઘરની સામે રહેતો યુવક લગ્નની લાલચે સગીરાને ભગાડી ગયો
બનાસકાંઠાના ડીસામાં ઘરની સામે રહેતો યુવક 14 વર્ષીય સગીરાને ભગાડી ગયો હોવાની ઘટના સામે આવી છે. જે મામલે સગીરાના પિતાએ ફરિયાદ નોંધાવતા ડીસા શહેર દક્ષિણ પોલીસે બંને યુવક-યુવતીની શોધ હાથ કરી છે.ડીસાના ભોપાનગરમાંથી એક સગીરાનું લગ્નની લાલચે અપહરણ થયું હોવાની ફરિયાદ નોંધાઇ છે. જેમાં ભોપાનગર વિસ્તારમાં રહેતો એક વ્યક્તિ મજૂરી કામ કરી પરિવારનું ગુજરાન ચલાવે છે. જેઓ ત્રણ દિવસ અગાઉ કામ અર્થે ધાનેરા મુકામે ગયા હતા અને રાત ત્યાં જ રોકાયા હતા. તે દરમિયાન વહેલી સવારે તેમની પત્નીનો મોબાઇલ પર ફોન આવ્યો હતો અને તેમની દીકરી ગુમ થઈ ગઈ હોવાનું જણાવતા તેઓ તરત જ પોતાના ઘરે પરત ફર્યા હતા. ચાર દિવસ તેઓ મોડી રાત્રે ઘરનું કામકાજ પતાવી ઓસરીમાં સુતા હતા. વહેલી સવારે જ્યારે તેમની પત્ની જાગીને જોતા તેમની દીકરી દેખાઈ ન હતી. જેથી તેમણે આજુબાજુમાં તપાસ કરતા તેમના ઘરની સામે રહેતો ચિકી પટણી નામનો યુવક તેમની દીકરીને ભગાડી ગયો હોવાનું માલુમ પડ્યું હતું. જેથી તેઓ યુવકના ઘરે જઈ વાત કરતા યુવકના પરિવારજનોએ બે દિવસમાં તેમની દીકરીને પરત લાવી આપવાની વાત કરી હતી, પરંતુ ત્રણ દિવસ થવા છતાં પણ તેમની દીકરી પરત ના આવતા આખરે સગીરાના પિતાએ યુવક સામે ફરિયાદ નોંધાવતા ડીસા શહેર દક્ષિણ પોલીસે બંનેની શોધખોળ હાથ ધરી છે.