![](https://www.rakhewaldaily.com/wp-content/uploads/2022/12/Rakhewal-378.jpg)
સલમાન ખાન હંમેશા સેટ પર મોડો આવતો : પ્રકાશ રાજ
મુંબઈ, સાઉથની ફિલ્મ ઈન્ડસ્ટ્રીમાં વિલનનું પાત્ર ભજવવા માટે જાણીતા એક્ટર પ્રકાશ રાજ રિયલ લાઈફમાં પોતાના બોલ્ડ નિવેદનો માટે જાણીતા છે. તેમણે બોલિવુડની કેટલીક ફિલ્મોમાં પણ યાદગાર પાત્રો ભજવ્યા છે. હાલમાં એક ઈન્ટરવ્યૂમાં તેમણે સલમાન ખાન સાથે કામ કરવાનો અનુભવ વર્ણવ્યો હતો તેમજ સેટ પર તે બધા સાથે કેવું વર્તન કરે છે તેનો ફોડ પાડયો હતો. જણાવી દઈએ કે, સલમાન અને પ્રકાશ રાજ ‘વોન્ટેડ’ તેમજ દબંગ ૨ તેમ બે ફિલ્મોમાં સાથે કામ કરી ચૂકયા છે. આ બંને બોક્સઓફિસ પર જબરદસ્ત હિટ રહી હતી અને ખાસ કરીને વોન્ટેડએ દબંગખાનના ડૂબતાં જઈ રહેલા કરિયરને બચાવ્યું હતું.
પ્રકાશ રાજે કહ્યું હતું કે ‘હું તેને એક એક્ટર તરીકે નથી જોતો. હું તેને એક મજાક કરતાં બાળક તરીકે જોઉ છું. તે કયારેય ઘરડો થવાનો નથી. તે જેવો છે તેવો જ દેખાય છે, ફિલ્ટર વાપરતો નથી. તે ક્રિમિનલ માઈન્ડેડ નથી. મેં તેની સાથે બે ફિલ્મો કરી છે, મને તેની કંપની ગમે છે. તે કોઈનાથી ડરતો નથી. તેને જે કહેવું હોય મોં પર કહે છે. તે પછી પ્રેમ વ્યક્ત કરવાની હોય કે ગુસ્સો કરવાની’. ત્યારબાદ તેમણે કહ્યું હતું કે, સલમાન ખાન સેટ પર હંમેશા મોડો આવે છે અને પોતાની જ ધૂનમાં કામ કરે છે.
સલમાન તેનું માર્કેટ સારી રીતે જાણે છે. તે જ્યારે પણ સેટ પર આવે ત્યારે અન્યને પણ આરામથી કામ કરવાની સલાહ આપે છે. ફેનને કઈ રીતે આકર્ષિત કરવાં તે અંગે પણ જ્ઞાન ધરાવે છે. એક એક્ટરમાં આ ખાસિયતો હોવી જરૂરી છે. કેટલાક એવા હોય છે જેને તમે જજ ન કરી શકો અને સલમાન તેમાંથી એક છે. પ્રકાશ રાજ ખૂબ જલ્દી સાઉથની બે ફિલ્મોમાં જોવા મળવાના છે. થોડા સમય પહેલા જ તેમણે તેમ કહીને ખળભળાટ મચાવી દીધો હતો કે, તેમનું કામ રાજનૈતિક વિચાર અને સંબંધોના કારણે ખરાબ થઈ રહ્યું છે. તેમણે તેમ પણ કહ્યું હતું કે, ઘણા લોકો તેમની સાથે કામ કરવા માગતા નથી. તેમણે કયારેય કોઈને અટકાવ્યા નથી.
પરંતુ તેમને ડર છે કે તેનાથી તેઓ ખુશ નહીં થાય. સલમાન ખાનના વર્કફ્રંટની વાત કરીએ તો, તે ખૂબ જલ્દી ફરી એકવાર કેટરીના કૈફ સાથે કબીર ખાનની ફિલ્મ ‘ટાઈગર ૩’માં સ્ક્રીન શેર કરતો જોવા મળશે, જેમાં ઈમરાન હાશ્મી પણ મહત્વના રોલમાં છે. આ સિવાય તેની પાસે ફિલ્મ ‘કિસી કા ભાઈ કિસી કી જાન’ પણ છે, જેમાં પૂજા હેગડે લીડ એક્ટ્રેસ છે. આ સિવાય શહેનાઝ ગિલ, રાઘવ જુયાલ અને સિદ્ધાર્થ નિગમ ખાસ પાત્રોમાં દેખાશે.