ત્રણ રાજ્યોમાં ભાજપની જીતથી ખુશ અમેરિકન સિંગરે પીએમ મોદીને શ્રેષ્ઠ નેતા ગણાવ્યા

પ્રખ્યાત આફ્રિકન-અમેરિકન ગાયિકા અને અભિનેત્રી મેરી મિલબેને રવિવારે ત્રણ રાજ્યો છત્તીસગઢ, મધ્યપ્રદેશ અને રાજસ્થાનમાં ભારતીય જનતા પાર્ટી (BJP)ની અદભૂત ચૂંટણી જીત પર વડા પ્રધાન નરેન્દ્ર મોદીની પ્રશંસા કરી.

મિલબેને તેમની એક્સ પોસ્ટમાં જણાવ્યું હતું કે પીએમ પદના ઉમેદવાર તરીકે ભારતની પ્રથમ પસંદગી નરેન્દ્ર મોદી છે. તેઓ યુએસ-ભારત સંબંધો માટે પણ શ્રેષ્ઠ નેતા છે. તમને જણાવી દઈએ કે રવિવારે ત્રણ મોટા રાજ્યો છત્તીસગઢ, મધ્યપ્રદેશ અને રાજસ્થાનમાં ભાજપે જોરદાર પ્રદર્શન કર્યું. બીજી તરફ તેલંગાણામાં કોંગ્રેસને મોટી જીતથી આશ્વાસન મળ્યું છે.

અગાઉ 7 સપ્ટેમ્બરના રોજ, આફ્રિકન-અમેરિકન ગાયકે PM મોદીના G20 ના સંપૂર્ણ સભ્ય તરીકે આફ્રિકન યુનિયનને સામેલ કરવાના પ્રસ્તાવ માટે પ્રશંસા કરી હતી. મિલબેને એક વિડિયો સંદેશમાં કહ્યું હતું કે આફ્રિકન યુનિયનને G20માં સંપૂર્ણ સભ્ય તરીકે સામેલ કરવાના વડાપ્રધાન મોદીના પ્રસ્તાવની હું પ્રશંસા કરું છું. વૈશ્વિક દક્ષિણ હવે નીતિઓને આકાર આપી શકે છે જે આપણા વિશ્વને અસર કરે છે.

41 વર્ષીય મિલબેન ભારતમાં તેમના રાષ્ટ્રગીત અને ભક્તિ ગીત ‘ઓમ જય જગદીશ હરે’ની રજૂઆત માટે લોકપ્રિય છે. તેમણે જૂન મહિનામાં વડાપ્રધાન નરેન્દ્ર મોદીની અમેરિકા મુલાકાત દરમિયાન એક કાર્યક્રમમાં ભારતનું રાષ્ટ્રગીત ‘જન ગણ મન’ ગાયું હતું. તે પહેલા પણ ઘણી વખત પીએમ મોદીના વખાણ કરી ચૂકી છે.